AGAD ipinag-utos ni Philippine National Police (PNP) chief, Police General Debold M. Sinas nitong Miyerkoles ang pagsibak sa PNP non-uniformed lawyer matapos maging positibo sa isinagawang random drug testing ng Internal Affairs Service sa Central Luzon.

“Let me reiterate that there is no place in the PNP for any personnel who is into illegal drugs, whether for recreational or habitual use,” ani Sinas.

Ayon kay Sinas, si Atty. Efren Garcia II ay isinasailalim sa pre-charge investigation at summary dismissal proceedings para sa kasong grave misconduct matapos na ang kinuha sa kanyang urine specimen noong Pebrero 24 ay magpositibo sa presensiya ng methamphetamine sa isinagawang screening at confirmatory drug testing base noong Pebrero 26.

Ang eksaminasyon ay isinagawa ni P/Major Christine Joy Sia Padua, forensic chemist ng Regional Crime Laboratory Office-3 for Central Luzon.

Si Garcia ay chief ng Legal Affairs Division ng Regional Internal Affairs Service 3 (RIAS 3).

Sinabi pa ni Sinas, ang administrative relief kay Garcia ay pagtitiyak na hindi nito maiimpluwensahan ang isinasagawang imbestigasyon. (JOEL O. AMONGO)