CAVITE – Nagsasagawa ng imbestigasyon ang pulisya hinggil sa pagkamatay ng isang lalaki na pinagbabaril ng riding in tandem sa parking lot ng isang disco bar sa Imus City noong Linggo ng madaling araw.

Isinugod sa Medical Center Imus ang biktimang si alyas “Christian” subalit namatay ito habang nilalapatan ng lunas bandang alas-5:15 ng umaga.

Inaalam pa ang pagkakakilanlan ng dalawang suspek na magka-angkas sa motorsiklo na tumakas matapos ang insidente.

Ayon sa ulat, bandang alas-4:30 ng madaling araw nang mangyari ang insidente sa parking lot ng 767 Club Disco sa Brgy. Palico 4, Imus City, kung saan nag-inuman ang biktima at mga kaibigan.

Nang matapos ang inuman ay papaalis na ang magbabarkada at naglalakad sa parking area nang lapitan ng suspek ang biktima at walang sabi-sabing pinagbabaril.

Matapos ang pamamaril, tumakas ang mga suspek na magkaangkas sa motorsiklo patungo sa direksyon ng Bacoor City, Cavite.

Mabilis namang isinugod ng mga kasamahan ang biktima sa ospital subalit namatay habang nilalapatan ng lunas. (SIGFRED ADSUARA)