LINAWIN NATIN ni ARDEE DELLOMAS

KUNG may dapat magpaliwanag ngayon, hindi si dating Department of Finance Secretary at ngayo’y Executive Secretary Ralph Recto — kundi ang mismong Kongreso na gumawa ng Special Provision 1(d).

Korte Suprema na ang nagsabi: Recto acted in good faith. Walang criminal liability.

Ayon kay Justice Zalameda ang proseso ay “Strictly ministerial… relied on clearances from the OGCC, COA, and GCG.” Ibig sabihin, bawal siyang tumanggi.

Kung hindi niya ipinatupad, sabi ni Justice Villanueva: “Then he may possibly become culpable of violating the law…”

Ayun pala. Kung sumunod — sinisisi. Kung hindi susunod — kakasuhan.

Ano ba ang gusto nila?

Ngayon ay malinaw: Hindi pwedeng gawing punching bag si Recto para lang pagtakpan ang butas sa batas.

Ipinaalala sa lahat ni Justice Rosario, “The constitutional infirmity… does not render criminal those who were duty-bound to follow it.”

At dahil wala ring masamang loob si Recto, sabi ni Justice Gaerlan: “Void does not negate good faith…”

So, sino ang nagpasok ng unconstitutional provision? Sino ang pumirma? Sino ang nag-deliberate? Sino ang nagbasa—or hindi nagbasa?

Hindi ang DOF. Hindi ang PhilHealth. Kongreso ang gumawa.

Sumunod lamang si Recto sa batas. The Court corrected the law. Ngayon, panahon na para tanungin: Sino ang gumawa ng batas na kinailangang itama?