ITINALAGA na ni Pangulong Rodrigo Roa Duterte si National Capital Region Police Office (NCRPO) director Police Major Gen. Debold Sinas bilang bagong PNP Chief.

Inanunsyo ngayon ni Presidential Spokesperson Harry Roque, na magsisimula sa kanyang bagong posisyon si Sinas bukas, November 10, kasabay ng pagbaba sa pwesto ni outgoing PNP chief, Gen. Camilo Cascolan na magreretiro na bukas.

“Tinalaga po ni President Rodrigo Duterte si Debold Sinas bilang bagong Philippine National Police chief effective po bukas, November 10,”ayon kay Sec. Roque.

Aniya, kung seniority ang susundin o ang rule of succession, si PNP deputy chief for administration Lt. Gen. Guillermo Eleazar ang number two man ng PNP.

Sa kabilang dako, wala namang ideya si Sec. Roque kung anong mga kwalipikasyon ang pinagbatayan ni Pangulong Duterte para pagpasyahan nitong italaga si Sinas bilang bagong PNP chief.

Magkaklase sa Philippine Military Academy (PMA) Hinirang Class of 1987 sina Police Lt. General Eleazar, na kasalukuyang commander ng Joint Task Force Covid Shield at P/Major Gen. Sinas.

Si Eleazar ay mahigit isang taon pa sa serbisyo bago magretiro sa Nobyembre 2021 habang si Sinas ay magreretiro sa Mayo 2021.

Si Sinas ay naging kontrobersiyal matapos taguriang mañanita cop. (CHRISTIAN DALE)