PURNADA ngayong holiday season ang balak ng mga basurero at iba pang mga kawani ng Pamahalaang Lungsod ng Valenzuela na ituloy ang nakaugalian na pagbabahay-bahay para mamigay ng sobre para manghingi ng pamasko.

Ito ay makaraang magpaalala ang Human Resource Management Office ng lungsod na ipinagbabawal sa mga kawani ng Pamahalaang Lungsod ang pagso-solicit o pagtanggap ng regalo mula sa sinumang indibidwal o grupong kanilang pinaglilingkuran.

Sakop ng kautusang ito ang mga nangongolekta ng basura, kaminero, at iba pang mga empleyado ng City Hall.

Ayon sa HRMO, kung sakaling may lumapit o humingi ng donasyon o solisitasyon at/o nagpapanggap na taga City Hall, kunin ang pangalan at opisina at agad ipagbigay-alam sa kanilang tanggapan.

Maaaring makontak ang Valenzuela City HRMO sa telepono bilang 8352-1000 loc. 1121/1124 hinggil dito. (ALAIN AJERO)