Hindi pa tapos ang ‘boksing’ sa Kamara DRILON AT PANGILINAN SINAKLOLOHAN ANG ABS-CBN

NAPAKALINAW ng nakasaad at ipinag-utos ng Saligang Batas sa Kongreso na ang batas para sa prangkisa ng isang kumpanya ng media ay magsisimula sa Kamara de Representantes o mababang kapulungan ng Kongreso.

Hindi maaaring mauna o pangunahan ng Senado o mataas na kapulungan ng Kongreso ang Kamara. Alam naman ito ng mga senador at kongresista.

Nakasaad sa Konstitusyon

KABISADO nila ang ligal at tamang prosesong ito na nakasaad sa Konstitusyon.

Alam ng mga mambabatas na hindi maaaring mauna ang mga senador na kumilos at magdebate hinggil sa hinihinging prangkisa ng ABS-CBN Broadcasting Corporation (ABS-CBN) sa Kamara.

Kahit iyong pinakamatagal nang senador o kongresista ay alam ang itinakda at ipinag-utos ng Konstitusyon sa mga mambabatas.

Ngunit, mayroong senador na ubod nang tigas ng ulo.

Nagpasa si Drilon ng S.B. 1530

NITONG Mayo 27, nakakuha ng malakas na suporta sa Senate Committee on Constitutional Amendments and Revision on Codes ang Senate Bill No. 1530 na inakda ni Senador Franklin “Frank” Drilon ng Liberal Party (LP).

Ayon kay Drilon, ang S.B. 1530 ay naglalayong amiyendahan ang Section 18, Book VII, Chapter 3 ng Revised Administrative Code na tungkol sa non-expiration ng lisensya.

Ang mungkahing batas ng 74-taong-gulang na senador ay nagsasabing mananatili ang operasyon ng isang ahensiya kahit tapos na ang kontrata nito, basta ang kondisyon o batayang ligal ay naihain ng mga opisyal ng kumpanya ang kanilang aplikasyon para sa pagpapatuloy ng kontrata o lisensya ng negosyo o ahensiya nang (1) tama sa panahon (2) at supisiyente ang laman ng aplikasyon.

Magpapatuloy ang operasyon ng negosyo/ahensiya habang inaantay ang pinal na desisyon ng ahensiya ng pamahalaan sa pagpapalawig ng taon ng operasyon ng aplikante ng kontrata.

Kapag naging ganap na batas, hindi puwedeng patigilin ang operasyon ng isang kumpanya nang kahit anong ahensiya ng pamahalaan.

Kahit ang Office of the President (OP) o Korte Suprema ay walang magagawa dahil mayroong ligal na batayan ang operasyon ng kumpanya.

Walang kinalaman sa prangkisa

HINDI tungkol sa prangkisa ng mga kumpanya ng telebisyon at radyo ang nasabing probisyon ng Revised Administrative Code.

Ang prangkisa ay manggagaling lamang sa Kongreso na magsisimula sa mababang kapulungan nito, batay sa itinakda at ipinag-utos ng Konstitusyon ng bansa.

Obligadong kilalanin, sundin at ipatupad ito dahil ang Konstitusyon ay pundamental na batas ng isang bansa tulad ng Pilipinas.

Ayon sa mga dalubhasa sa Saligang Batas, o ang tinatawag ng mga abogado na “Constitutional Experts” ay bawal magpasa ng panukalang batas ang Kongreso o hindi pinahihintulutan ng Konstitusyon ang sinomang mambabatas mula sa pamahalaang barangay hanggang sa pangulo ng bansa na gumawa at magpasa ng batas na taliwas o tutol sa Saligang Batas.

Ang pangulo ng bansa ay mayroong kapangyarihang maglabas ng batas hinggil sa ilang isyu ng bansa at pamahalaan sa pamamagitan ng tinatawag na “executive order (EO).” ‘Bagsik’ at ‘tapang’ para sa ABS-CBN SA kabila ng limitasyon ng kapangyarihan ng mga kasapi ng Kongreso sa pagbalangkas ng batas ay iwinasiwas ni Senador Franklin Drilon ng Iloilo ang kanyang ‘bagsik’ at ‘tapang’ bilang beteranong senador nang maghain ng panukalang batas na walang dudang magsasalba sa kumpanyang pag-aari ng kanyang kababayan sa Iloilo.

Mulang Ilolilo ang napakayamang angkan ng Lopez.

Si Drilon ay naging kalihim ng Department of Justice (DOJ) noong panahon nina Corazon Cojuangco Aquino at Fidel V. Ramos.

Tatlong beses naging pangulo ng Senado si Drilon (2000, 2001-2006 at 2013-2016).

Siya rin ay chairman ng LP, partido ng oposisyon na kilala rin sa bansag na “dilawan.”

Sa kasalukuyan, lider ng minorya si Drilon sa Senado.

Sa kanyang S.B. 1530, ipinababago ni Drilon ang probisyon sa Revised Administrative Code tungkol sa kontrata o lisensya ng isang kumpanya o ahensiya upang maisama rin ang “prangkisa” ng mga kumpanya ng telebisyon at radyo tulad ng ABS-CBN.

‘Fill the gap’ ng prangkisang tapos na

GUSTO ni Drilon ay huwag maagrabyado ang mga kumpanya ng telebisyon at radyo na tapos na ang prangkisa.

Ito ang pahayag ng press statement ng senador na inilabas nitong Mayo 27: “Drilon explained that [his proposed senate] bill would fill the gap in cases where a franchise has expired while its renewal remains pending [in the House of Representatives].”

Ipinaalala ng mambabatas na: “Congress has applied considerations of equity in previous similar situations and the measure seeks to institutionalize that practice.”

Ang tinutukoy ni Drilon dito ay ang ginawa at pagtrato ng Kongreso sa prangkisa ng ibang kumpanya ng telebisyon at radyo, kabilang na ang isa pang higanteng GMA Network Inc.

Nagpalusot si Drilon

NGUNIT, biglang nagpalusot si Drilon kung saan idiniin niya sa parehong press statement na: “[My proposed] amendment would merely encourage the concerned agency or branch of government, including Congress, to act decisively on an application for renewal, and to express its decision in clear, unmistakable terms, ensuring that the applicant is not punished for the authority’s indecision or inaction.”

Isa sa ginamit na batayan ni Drilon ay ang rekord ng Kapisanan ng mga Brodkaster sa Pilipinas (KBP) na umaabot sa sampung kumpanya ng telebisyon at radyo ang nagpatuloy ng kanilang operasyon sa mga nakalipas na panahon kahit tapos na ang prangkisa.

Ayon sa KBP, nagpasa ng aplikasyon ukol sa pagpapalawig ng prangkisa ang mga nasabing kumpanya.

Ngunit, walang desisyon ang Korte Suprema kahit kailan na ligal at tama ang praktis na sinasabi ng KBP at ng iba pang personahe, kabilang na ang mga substansiyal na bilang ng mga mambabatas, tulad ni House Speaker Alan Peter Cayetano.

‘Walang operasyon kung walang prangkisa’ – Korte Suprema

NABATID ng manunulat na ito na ang umiiral na jurisprudence na galing sa Korte Suprema ay ang desisyong “walang operasyon kung walang prangkisa.”

Inilabas ito ng Ikatlong Dibisyon ng mataas na korte noong Pebrero 2003 na ang naging ponente ay si Senior Associate Justice Reynaldo Puno na naging chief justice ng pinakamataas na korte ng bansa noong 2006.

Kahit napakatagal na ng nasabing desisyon, nananatili itong wasto at kailangang ipatupad.

Mababago lamang ito kung mayroong panibagong pasya ang Korte Suprema na nagbabago at nagpapatumba sa mga argumento ni Puno noong 2003.

Nakasalang ngayon ang petisyon ng ABS-CBN sa mataas na korte na nagpapawalang bisa sa pagpapatigil ng National Telecommunications Commission (NTC) ng operasyon ng nasabing kumpanya noong Mayo 5.

Balik-operasyon bago sumapit ang Agosto?

INAMIN mismo ni Drilon sa nasabing press statement na ang totoong layunin ng kanyang S.B. 1530 ay makabalik ang operasyon ng lahat ng himpilan ng telebisyon at radyo (DZMM) ng ABS-CBN sa mga rehiyon ng bansa.

“The bill, once passed and enacted into law, could give ABS-CBN a chance to operate again and save its 11,000 workers from imminent retrenchment in August,” malinaw na pahayag ni Drilon.

Alam na alam ni Drilon bilang third placer sa Philippine Bar Examinations noong 1969 at bilang dating mahusay na abogado ng malalaking korporasyon at bago maging opisyal ng administrasyon ng namayapang Pangulong Corazon Cojuangco Aquino hanggang naging ‘matinik’ na politiko na hindi puwedeng pangunahan ang Kamara de Representantes sa pagpasa ng panukalang batas hinggil sa prangkisa ng kumpanyang telebisyon at radyo tulad ng ABS-CBN, ngunit naghain pa rin ang senador ng S.B.

1523 upang hindi tuluyang mawalan ng trabaho ang mahigit 11,000 empleyado ng kumpanyang pag-aari ng pamilya Lopez ng Iloilo sa Agosto.

Inihayag sa Kamara nitong Mayo 26 ng pangulo ng ABS-CBN Broadcasting Corporation na si Carlo Lopez Katigbak na posibleng matanggal ang napakalaking bilang sa mahigit 11,000 nilang mga manggagawa dahil milyun-milyon ang ikinalulugi ng Kapamilya Network mula nang ipatigil ang operasyon nito noong Mayo 5.

Mayo 4 ang huling araw ng 25 taong prangkisa ng ABS-CBN na ibinigay ng Kongreso noong Marso 30, 1995.

Iwinasto ito ni Rep. Rodante Marcoleta dahil ayon sa huli ay 2,661 lang ang regular na mga empleyado ng ABS-CBN at mahigit 8,500 ay pawang kontraktuwal at “talent” kung tawagin.

Malakas ang suporta sa S.B. 1530 – Drilon

AYON kay Drilon, malakas ang suporta ng mga senador na kasapi ng Senate Committee on Constitutional Amendments and Revision on Codes makaraang karamihan sa kanila ay pumabor sa kanyang panukalang batas na sasalo sa pagtigil ng negosyo ng pamilya Lopez sa naganap na pagdinig ng komite nitong Mayo 27.

Isang araw matapos magsimulang talakayin ng House Committee on Legislative Franchises at House Committee on Public Accountability na pinamumunuan nina Rep.

Franz Alvarez ng Palawan at Rep. Michael Defensor ng Anakalusugan party-list, ayon sa pagkakasunod.

Hindi natapos ang ‘boksing’ ng mga kongresista noong Martes dahil napakaraming isyung nakapulupot sa ABS-CBN.

Ipagpapatuloy ng mga kongresista ang pagtalakay at pagdinig sa prangkisa ng Kapamilya Network.

Ngunit, nitong Miyerkoles, tinalakay at pinaboran ng komiteng pinamumunuan ni Senador Francis “Kiko” Pangilinan ang panukalang batas ni Drilon na pabor na pabor sa ABS-CBN.

Kampi rin si Pangilinan sa ABS-CBN

HINDI tinutulan ni Senador Pangilinan ang S.B. 1523 ni Drilon.

Tulad ni Drilon, si Pangilinan ay opisyal din ng LP.

Ang LP ay ang partido na namayagpag mula 2010 hanggang 2016.

LP ang partidong tinakbuhan ng ‘manok’ ng pamilya Lopez noong eleksyong 2016 na si Manuel “Mar” Roxas II, ngunit nilampaso ng alkalde noon ng lungsod ng Davao na si Rodrigo Duterte.

Si Pangilinan ay asawa ni Sharon Cuneta na artista ng ABS-CBN.

Si Cuneta ay isa sa mga artistang nanawagan sa mga mambabatas na ibigay ang prangkisa ng ABS-CBN.

Si Pangilinan ay bayaw ng mang-aawit na si Gary Valenciano na beterano na sa ABS – CBN.

Upang patunayang wasto ang ginawang pagsaklolo nina Drilon at Pangilinan sa ABS – CBN, inilabas din ng senador mulang Iloilo ang solidong suporta umano sa S.B. 1530 ng ilang personalidad.

Sumuporta si Carpio

ANG banggit ng press statement ni Drilon nitong Mayo 27, “Former Senior Associate Justice Antonio Carpio expressed support to the measure, citing the “unequal protection of the law and discrimination” in the implementation of the law.”

Ganito ang nakasaad sa press statement na paliwanag ni Carpio: “I support the enactment into law of Senate Bill No. 1530 introduced by Sen. Drilon on the ground that it will remove the unequal protection of the law that presently exists in the renewal of franchises by Congress.”

Tinukoy pa raw ni Carpio na: “all holders of franchises that expired pending renewal in Congress were allowed to operate until Congress finally acted on the renewal of their franchises.”

“This violates Section 1, Article III of the Constitution which guarantees equal protection of the law. Senate Bill No. 1530 remedies this unequal protection of the law,” patuloy ni Carpio, ayon sa parehong kalatas ni Drilon.

Pati KBP, kumampi kay Drilon

UPANG lalong busugin ang publiko sa tingin niyang ‘kawastuhan’ ng aksiyon, iwinasiwas din ni Drilon ang posisyon ng organisasyon ng mga brodkaster sa Pilipinas.

“The Kapisanan ng mga Brodkaster ng Pilipinas (KBP) also threw its support behind the measure,” banggit ng kalatas ng mambabatas.

“This bill addresses the unfortunate situation wherein renewal for franchise applications are filed before expiration but are not acted upon in time,” pahayag ni KBP President Ruperto S. Nicdao, Jr. na matatagpuan sa press statement ni Drilon.

Binanggit din ni Drilon ang posisyon ng iba pang organisasyong paborable sa pagpapatuloy sa operasyon ng ABS-CBN sa susunod na 25 taon uli.

Sa labis-labis na kaligayahan ni Drilon sa suportang ipinaabot sa S.B. 1530, lubos ding kinilala at pinasalamatan niya ang mga sumuporta sa kanyang ‘priority bill.’

“[I] acknowledged and thanked those who expressed support to the [S.B. 1530],” pahayag ng mambabatas.

Nanawagan din siya sa kapwa senador na madaliin ang pagpasa ng kanyang mungkahing pagbabago sa Revised Administrative Code. NELSON S. BADILLA

Related posts

Leave a Comment