PATAY ang isang lalaki at marami ang nawalan ng tirahan sa sunog na sumiklab sa dalawang palapag na apartment building sa Zambales Street, Brgy. San Martin de Porres, Quezon City dakong alas-2:00 ng madaling araw nitong Miyerkoles.

Sinabi ng Bureau of Fire Protection (BFP), mabilis na tinupok ng apoy ang itaas na palapag ng paupahang bahay dahilan upang ilagay sa first alarm ng BFP ang insidente.

Ayon sa ulat, hindi bababa sa 13 fire trucks at ilang fire volunteer group ang nagresponde sa insidente. Idineklara ng mga bumbero na kontrolado ang apoy pagkatapos ng halos 30 minuto.

Nabatid sa isang babaeng nangungupahan, nagising siya dahil sa makapal na usok at ilang segundo na lang para makatakas.

“Nu’ng tumayo ako, pagbukas ko ng pinto, bumungad ‘yung apoy sa mukha ko… Naalimpungatan na ako, tumakbo na ako palabas. May tumutulo nang apoy, parang styrofoam sa itaas ng kisame,” sabi nito na nabigla sa pangyayari.

Nabatid sa babae na nawala ang lahat ng kanyang ari-arian ngunit sinabi niyang nagpapasalamat siya na buhay siya, tinawag itong kanyang pangalawang buhay.

“Mahirap na bumalik eh kasi ang bilis kumalat ng apoy doon mismo sa tabi ng kuwarto ko.”

Ang isa pang lalaking nangungupahan, na nabigo rin na magligtas ng anomang ari-arian, ay nagkaroon ng first-degree na paso sa kanyang balikat at braso.

“Nakalulungkot, binawian ng buhay ang isang lalaking nangungupahan na nakulong sa kanyang silid sa ikalawang palapag. ‘Yung ating biktima, natagpuan po sa ikalawang palapag doon. Ngayon po, inaalam pa natin ang pagkakakilanlan niya,” sabi ni Senior Fire Officer 4 SFO4 Rolando Valeña, arson investigator ng Quezon City Fire District.

Kasalukuyang iniimbestigahan ng BFP ang sanhi ng sunog, at ang kabuuang halaga ng pinsala nito.

(PAOLO SANTOS)