NASABAT ng Bureau of Customs Subport of Mactan ang labing apat (14) na kilos ng buhay na isda mula sa Taiwan.

Ang shipment ay dumating sa Mactan-Cebu International Airport noong nakaraang Nobyembre 25, 2020 na walang Import Clearance mula sa Bureau of Fisheries and Aquatic Resources (BFAR).

Sa isinagawang inspection ni Customs Acting Warehouseman Niña Cheza A. Dela Peña kasama si BFAR Quarantine Officer Ronald O. Cabiles, ang ornamental fish na mas kilala sa tawag bilang Angelfish at Guppies ay dumating mula Taiwan via Hong Kong na nakalagay sa mga plastic bag na nasa loob naman ng box.

Sa beripikasyon ng mga dokumento sa pagdating ng nasabing mga isda ay wala itong naipakitang clearan­ces mula BFAR.

Dahil dito, si Port of Cebu Acting District Collector Atty. Charlito Martin R. Mendoza ay nag-isyu ng isang Warrant of Seizure and Detention laban sa shipment para sa paglabag sa Section 1113 (F) at (L) (5) na may kaugnayan sa Section 117 ng Customs Modernization and Tariff Act (CMTA).

“Prior to shipping, especially for live animals, and other regulated goods, please be sure to know and secure the proper clearances from our regulating agencies, comply with customs procedures and duties, and know the consequences of not doing so,” ani Subport of Mactan Collector Gerardo A. Campo paalala sa impor­ters.

Kaugnay nito, ang naturang shipment ay itinurn over ng Subport of Mactan sa BFAR para sa kaukulang disposisyon.