Day: October 26, 2021

INILUNSAD kahapon ng National Press Club (NPC), sa pakikipag-ugnayan sa Philippine National Police (PNP) ang isang kampanyang naglalayong tulungan ang mga mamamahayag na irehistro at gawing lehitimo ang pagmama-ari at pagbitbit ng baril bilang seguridad sa peligrong kaakibat ng trabaho.

Ayon sa NPC na magdiriwang ng ika-69 na anibersaryo, malaking bentahe ang maging sigurista lalo pa’t peligroso ang trabaho ng mga peryodista sa paghahayag at pagsisiwalat ng balita at anomalya.

Binigyang pagkilala din ng grupo ang malasakit na ipinamalas ni PNP Chief Gen. Guillermo Eleazar sa mga mamamahayag na matapang na nagbabalita at bumabatikos batay sa impormasyon ay ebidensyang nakalap nito. Ito din, ayon sa pamunuan ng NPC ang dahilan kung bakit may mga pagkakataong kailangan din ng mga peryodista ang magbitbit ng armas bilang paniguro.

Gayunpaman, hindi lang mga miyembro ng media ang pwedeng mag-aplay ng LTOPF, kundi maging ang mga gun enthusiast, mga miyembro ng ibang organisasyon, mga opisyal at kawani sa mga ahensya ng pamahalaan at mga negosyanteng target ng mga masasamang loob.

Sa mga nagnanais sumailalim sa proseso, kailangan lamang pumasa sa drug at neuro test, at magprisinta ng police clearance.

Panawagan naman ni NPC President Paul Gutierrez sa mga kapwa peryodista, samantalahin ang pagkakataong palisensyahan ang pag-aaring baril, kasabay ng giit na mas mainam magsiguro kesa malagay sa peligro.

Ang LTOPF caravan ay bahagi ng isang buwang aktibidad ng NPC kaugnay ng anibersaryong may temang “Strong and Resilient @69.” (LILY REYES)

UMABOT sa P6.9 milyong ang halaga ng ilegal na droga ang nasamsam ng mga tauhan ni PNP-Police Regional Office 5 Director, P/BGen. Jonnel C. Estomo sa ikinasang serye ng anti-narcotics operations katuwang ang Philippine Drug Enforcement Agency (PDEA) ROV.

Nagresulta ito sa pagkakahuli sa drug personalities na sangkot pagpapalaganap ng ilegal na droga sa rehiyon.

Ayon sa ulat na isinumite kay Bicol PNP chief, P/BGen. Estomo, mahigit isang kilo ng shabu ang nakumpiska sa inilatag na high impact anti-drug operation sa Brgy. Palestina, Pili, Camarines Sur laban sa suspek na si Alvin Baldoza y Gamayan, residente ng Brgy. Agos, Bato, Camarines Sur.

Inihayag ni P/Major Maria Luisa Calubaquib, PNP-PRO5 spokesperson, si Baldoza ay isang surrenderee sa Oplan Tokhang.

Base sa ipinaabot na ulat ng Camarines Sur PPO (CS PPO), ang poseur buyer ng PNP ay matagumpay na nakabili ng isang pakete ng selyadong plastic mula sa suspek na naglalaman ng 100 gramo ng hinihinalang shabu sa halagang P300,000.

Matapos ang transaksyon, nagbigay ng hudyat ang poseur buyer sa iba nitong kasamahan. Habang papalapit ang mga ito, dali-daling binunot ng suspek ang kanyang kalibre .45 pistola at pinaputukan ang poseur buyer na maswerte namang nakailag.

Pinakiusapan ng mga pulis ang suspek ngunit hindi ito nagpatinag bagkus patuloy itong nagmatigas at muling pinaputukan ang mga operatiba. Upang depensahan ang kanilang sarili, napilitang gumanti ng putok ang mga pulis na naging sanhi ng pagkamatay ng suspek.

Sa ginawang body frisk, nakuha rin kay Baldoza ang 900 gramo ng ilegal na droga. Sa kabuuan, umabot sa isang kilong shabu ang nakuha mula sa suspek na may standard price na P6.8 milyon. Ayon sa imbestigasyon ng PNP, si Baldoza ay kinikilalang bodegero at

supplier ng droga sa Camarines Sur partikular na sa Rinconada, gayundin sa ikatlong distrito ng Albay. Ang supply nito ay nagmumula pa sa New Bilibid Prison (NBP).

Samantala, bago pa man ang operasyong ito, noong Oktubre 25, 2021 dalawa pang notoryus drug dealer ang nahuli ng PNP Bicol sa probinsya pa rin ng Camarines Sur.

Alas-kwatro ng hapon sa Brgy. Libod 2, Libmanan ay naaresto sa buy-bust operation ang street value individual (SLI) na si Redentor Agna y Dela Cruz, 38, residente ng nabanggit na lugar.

Ito ay nang magpositibo ang search warrant na inihain ng mga kawani ng CS PPO laban dito. Nakuha sa suspek ang walong pakete ng shabu na nagkakahalaga ng P8,000.

Sa kabilang dako, arestado rin ang isang kapitan ng Brgy. Dahat, Lagonoy sa ikinasang pagsisilbi ng search warrant operation ng pulisya at PDEA dakong 10:00 ng gabi.

Kinilala ang suspek na si Chiz Navea y Hanapin alyas “Kap Chiz”. Siya ay tinaguriang no. 3 sa municipal drug watchlist ng naturang munisipalidad. Nakuha sa kanyang tirahan ang tinatayang 25 gramo ng shabu na P170,000 ang halaga.

Sa nasabing serye ng mga operasyon, umabot sa P6,978,000 halaga ng ilegal na droga ang nakumpiska ng PNP Bicol at PDEA ROV. Ito ay patunay sa agresibong pagkilos ng gobyerno upang dakpin at mailagay sa likod ng bakal na rehas ang sino mang sangkot sa lantaran at garapalang pagbebenta ng ipinagbabawal na gamot.

Samantala, nanawagan si P/BGen. Estomo sa mga aktibong tulak ng droga at mga protector nito na sumuko o ‘di kaya itigil na ang kanilang ilegal na gawain.

“Nalalabi na ang inyong mga araw, kami sa hanay ng PNP Bicol kasama ang PDEA ROV at pursigidong tapusin at tuldukan na ang

malawakang problemang ito. Walang patutunguhan ang inyong mga buhay kung patuloy kayong magpapalulong sa gawaing ito. Piliin ninyo sanang magbago hindi lamang para sa inyong sarili at pamilya kundi para sa pangkalahatang benepisyo ng rehiyong Bicol” ayon kay RD Estomo. (JESSE KABEL)

Read More

HINDI na pinapasok ang mga batang edad 12 pababa sa Manila Baywalk Dolomite Beach simula kahapon.

Sa isang pulong, sinabi ni Manila Police District (MPD) Director Police Brig. Gen. Leo Francisco na layon nitong maiiwas sa posibleng pagkahawa sa sakit ng mga bata at mapigilan ang posibleng superspreader event na resulta ng pagkukumpulan ng mga tao.

Papayagan naman ang mga person with disability at mga senior citizen at magtatalaga ng special lane para sa mga ito.

Kaugnay nito, isasara ang kontrobersyal na ‘beach’ ngayong Undas. Sarado rin ito tuwing Biyernes para sa maintenance works.

Lilimitahan naman sa 3,000 ang kapasidad ng Dolomite Beach kumpara sa halos 6,000 katao na dumagsa kamakailan.

Bukod dito, magtatalaga ng opisyal kada araw na siyang titiyak na sinusunod ang health protocols ng mga namamasyal. (RENE CRISOSTOMO)

HINDI dapat palagpasin ng Inter-Agency Task Force (IATF) ang katampalasan ng Department of Environment and Natural Resources (DENR) na naglagay sa peligro sa buhay ng hindi bababa sa 8,000 kataong sabayang dumagsa sa unang araw ng muling pagbubukas ng Manila Bay Dolomite Beach, sa kahabaan ng Roxas Boulevard sa lungsod ng Maynila.

Sa isang panayam sa ANC kahapon, nanawagan si Manila Mayor Isko Moreno sa IATF na sampahan ng karampatang kaso ang mga opisyal ng DENR na nagbukas ng kontrobersyal na pasyalan nang lingid sa kaalaman ng lokal na pamahalaan – bagay na dapat sana’y napaghandaan ng naturang kagawaran sa pakikipagtulungan sa Manila City government.

Pag-amin ng alkalde, ang pasyang muling buksan ang Dolomite Beach sa Maynila ng Manila Bay Coordinating Office – isang ahensyang direktang pinangangasiwaan ng DENR, ay ikinagulat ng lokal na pamahalaan. Aniya, trabaho ng MBCO ang makipag-ugnayan sa iba’t ibang ahensya pagdating sa rehabilitasyon, pagbabalik-anyo at pagpapanatili ng kaayusan ng nasabing proyekto.

Sa tala ng LGU, tila hindi napaghandaan at inaasahan ng DENR ang bugso ng mga bumibisitang tao, na aniya ay umabot pa sa 65,000 nitong nakaraang Linggo. Kabilang din aniya sa mga nasa Dolomite Beach ay mga batang edad 12 pababa. (RENE CRISOSTOMO)

INANUNSYO ng Bureau of Immigration (BI) ang pagkakaaresto sa Israeli national na nahaharap sa 200 complaints na inihain sa Germany ng kanyang mga biktima sa fraud cases at multi-million-euro investment scam.

Kinilala ni Immigration Commissioner Jaime Morente ang nasabing suspek na si Kfir Levy, 43-ayons, kasaluyan nasa kustodiya ng BI makaraang naaresto noong Biyernes, Oktubre 22, 2021 sa Diosdado Macapagal Avenue, Pasay City ng mga operatiba mula sa bureau’s Fugitive Search Unit (FSU).

Sinabi ni Morente, sa pamamagitan ng inisyu niyang mission order, inaresto ng kanyang mga tauhan si Levy dahil sa kahilingan ng German authorities na nagbigay ng impormasyon sa BI hinggil sa nabanggit na pugante.

Sa kabuuan, umabot umano sa tinatayang 6.3 million euros ang nakulimbat ng suspek sa kanyang mga biktima.

“Two weeks ago, we received information from German authorities about the charges against him,” ani Morente. “Now that we have him in custody, we will proceed with the deportation proceedings so he may be deported and blacklisted from the country for being an undesirable alien.”

Ipinaliwanag ni Morente na ang Israeli ay isang high-profile fugitive na pakay ng dalawang arrest warrants na inisyu ng German courts noong Pebrero ng nakaraang taon dahil sa pagkakasangkot sa ilegal na aktibidad ng fraud syndicate na kinabibilangan nito at umabot ng dalawang daan ang mga biktima mula taong 2016 hanggang 2019.

Ang unang warrant of arrest ay inisyu noong Pebrero 13, 2020 ng Bamberg District Court sa San Bavaria, habang ang ikalawa naman ay European arrest warrant na inisyu ng local court sa Bamberg.

Inihayag naman ni BI-FSU acting chief Rendel Ryan Sy, si Levy na overstaying alien ay nanatili sa Pilipinas simula nang dumating bilang turista noong Enero 30, 2020.

Sinabi pa ni Sy na ang nasabing dayuhan na nahaharap sa sampung taon na pagkakakulong, ay miyembro ng criminal syndicate na nag-o-operate ng trading platforms na may kaugnayan sa Internet at nakatuon sa large-scale fraud sa kanilang mga customer, sa pamamagitan ng telephone calls at emails, at nanghihikayat na mag-invest ng malaking halaga ng pera at nangangako na maibabalik ang investment na may malaking tubo.

Si Levy ay kasalukuyang nakakulong sa BI warden facility sa Camp Bagong Diwa, Taguig City habang nakabinbin ang deportasyon. (JOEL O. AMONGO)

SWAK sa kulungan ng Criminal Investigation Detection Unit (CIDG) na nakabase sa Manila Police District, ang isang top 1 most wanted person dahil sa pagpatay at tangkang pagpatay sa live-in partners sa San Andres Bukid, Manila at natunton sa Baliuag, Bulacan noong Lunes ng gabi.

Kinilala ni P/Major Delta Navarra, hepe ng CIDG-Manila, ang suspek na si Jhonny Martinez y Vinluan, 34-anyos, binata, kaanib ng Bahala na Gang at residente ng Batangas Line, San Andres Bukid.

Batay sa ulat ni P/Capt. Alfredo Tan Jr., hepe ng MPD-Warrant and Subpoena Section, nakipag-ugnayan sa kanila ang CIDG Manila para sa pagtugis sa suspek sa kasong murder at frustrated murder.

Dahil dito, nakipag-koordina muna sila sa Baliuag Police Station bago ikinasa ang manhunt operation ng pinagsanib na puwersa sa Dulong Bayan St., Barangay Sulivan ng nasabing bayan, sa bisa ng arrest warrant na inisyu ni Judge Thelma Bunyi-Medina ng Regional Trial Court Branch 32 ng Manila.

Ayon sa rekord ng pulisya, binaril at napatay ni Martinez at dalawa pang mga suspek noong noong Marso 18, 2012 si Jasper Nico Jalarilla sa San Andres Bukid.

Matapos mapatay ang biktima, binalikan naman ng mga suspek ang kinakasama ng biktima na si Ana Rolyne Mercado ng Bo. Sta. Maria, Paco, Manila ngunit bigo ang mga suspek na patahimikin ang ginang. (RENE CRISOSTOMO)

ARESTADO ang dalawang lalaki sa drugs buy-bust operation makaraang makumpiskahan ng isang kilong shabu na tinatayang P6.8 milyon ang halaga sa Pasay City noong Lunes ng gabi.

Ayon sa ulat, dakong alas-8:55 gabi nang magsagawa ng magkasanib na operasyon ang PDEA RSET, PDEA ORMIN PO, PDEA Marinduque PO at at PDEA Romblon laban kina Jake Hernandez at Lorieben delos Santos, 18-anyos, sa nasabing lugar na nagresulta sa pagkakadakip sa mga suspek na nakumpiskahan ng isang malaking plastic sachet ng isang kilo ng shabu, at buy-bust money.

Inihayag ng mga awtoridad na inamin umano ni Delos Santos na pang-apat na nilang lakad iyon. Habang sinabi naman ni Hernandez na magkakilala sila ngunit driver na tagahatid lamang ni Delos Santos ang papel niya.

Itinuro ni Delos Santos na ang kanyang tiyuhin ang nag-utos sa kanya upang mag-deliver ng shabu.

Patuloy ang follow-up operation ng mga operatiba para madakip ang source ng ilegal na droga habang inihahanda ang kasong paglabag sa RA 9165 o Comprehensive Dangerous Drugs Act of 2002 laban sa dalawang suspek. (DAVE MEDINA)