NAKAPAGTALA ng tig-isang pulis na positibo sa coronavirus 2019 (COVID-19) sa apat na presinto ng Manila Police District (MPD).

Bukod sa MPD-Binondo Police Station 11 na mayroong maraming kaso ng COVID-19, kinumpirma ni MPD Director, P/BGen. Leo “Paco” Francisco na may tig-isang pulis na nagpositibo rin sa COVID-19 sa apat pang presinto.

Gayunman, tumanggi muna si Francisco na tukuyin kung alin-aling presinto nila ang nakapagtala ng mga kaso ng impeksyon.

Tiniyak nitong naka-quarantine na ang nasabing mga pulis at nagsagawa na ng contact tracing sa mga taong nakasalamuha ng mga ito.

Unang nai-report na ang Binondo Police Station 11 ay isinailalim sa tatlong araw na lockdown para sa disinfection makaraang 46 pulis nito ang nagpositibo sa virus. (RENE CRISOSTOMO)