ALINSUNOD sa General Order ni PNP Acting chief, PLt. Gen. Jose Melencio Nartatez Jr., kabilang sa isinailalim sa balasahan ang pitong heneral at tatlong colonel.

Kabilang sa pitong heneral na isinailalim sa panibagong balasahan sa hanay ng Philippine National Police (PNP) ay si PBGen. Wilson Asueta na uupo bilang bagong hepe ng PNP Anti-Cybercrime Group mula sa Directorate for Information and Communications Technology Management (DICTM).

Habang si PBGen. Eleazar Matta na mula naman sa Police Regional Office 9 o Zamboanga Peninsula PNP, ay siyang papalit kay Asueta sa DICTM.

Buhat naman sa PNP Drug Enforcement Group (PDEG), lilipat si PBGen. Edwin Quilates sa Police Regional Office 9, kapalit ni Matta.

Papalit kay Quilates sa PDEG si PBGen. Elmer Ragay na magmula sa Office of the PNP Chief; habang sa PNP-Explosives Ordinance Division/K9 unit si PBGen. Salvador Alacyang na mula naman sa Police Regional Office 8 (Eastern Visayas).

Mula naman sa Personnel Holding and Accounting Unit (PHAU), ililipat sa Police Regional Office 11 (Davao) si PBGen. Leon Victor Rosete at makapapalitan nito si PBGen. Joseph Arguelles.

Si PCol. Froilan Navaroza na Deputy Chief sa Public Information Office (PIO), ay malilipat naman sa Police Regional Office 8, habang si PCol. Jonathan Abella ay malilipat sa PHAU buhat sa EOD/K9.

Mula naman sa Office of the Chief PNP, ililipat si PCol. Thor Valiente Cuyos sa Police Regional Office 11.

Ang nasabing balasahan ay epektibo ngayong araw ng Biyernes, Nobyembre 14.

(TOTO NABAJA)