TARGET NI KA REX CAYANONG

SA ilalim ng temang “Pagkakaisa at Pagtutulungan upang Kaunlaran at Kapayapaan ay Makamtan,” isinagawa ang mahalagang pagtitipon sa Sumadja Hall, Sulu Area Coordinating Center, kung saan personal na nag-abot ng tulong pinansyal sina Governor Abdusakur Tan, Vice Governor Abdusakur Tan II, at Barangay Chairman Nurhakeem Uddin ng Brgy. San Raymundo sa mga residenteng naapektuhan ng proyekto sa pagpapalawak ng kalsada ng Pamahalaang Panlalawigan ng Sulu.

Sa kanyang talumpati, malinaw na ipinaliwanag ni Governor Tan ang mga layunin ng proyekto at kung paano ito makatutulong sa pagpapanatili ng kaayusan at kaligtasan ng publiko sa buong probinsya.

Binanggit din niya ang iba’t ibang mga proyekto ng pamahalaan na naglalayong isulong ang kaunlaran at kapayapaan ng Sulu. Hindi rin niya nakalimutang humingi ng paumanhin sa mga abalang idinulot ng proyekto, na patunay ng kanyang malasakit sa kapakanan ng mamamayan.

Isang mahalagang aspeto ng kaganapan ay ang pagbibigay ng pagkakataon sa mga residente na ihayag ang kanilang mga saloobin, mga alalahanin, at mga mungkahi. Sa ganitong paraan, naipakita ni Governor Tan ang kanyang bukas na pamumuno at ang kahandaang pakinggan ang tinig ng bawat isa.

Mismong siya ang nagbigay-linaw sa mga maling akala at mahahalagang isyu na nais bigyang pansin ng mga residente. Ang ganitong hakbang ay nagpapatunay ng matibay na ugnayan sa pagitan ng pamahalaan at ng mamamayan.

Ang pagbibigay ng tulong pinansyal ay hindi lamang simbolo ng suporta kundi isang kongkretong hakbang ng pamahalaang panlalawigan upang tiyakin na ang mga naapektuhan ng proyekto ay hindi mapababayaan.

Sa gitna ng mga hamon, ipinamalas ng mga opisyal ng Sulu ang tunay na diwa ng serbisyo publiko—isang serbisyo na may malasakit at pagpapahalaga sa kapakanan ng bawat isa.

Hindi maikakaila na ang mga proyekto tulad ng pagpapalawak ng kalsada, ay mahalagang hakbang tungo sa mas maunlad na Sulu. Ngunit tulad ng anomang pagbabago, ito ay may kaakibat na mga hamon.

Sa kabila nito, ang pagbibigay ng tulong at ang bukas na pakikitungo ng pamahalaan sa mamamayan ay nagpapakita ng isang pamahalaang handang magsakripisyo at makinig para sa ikabubuti ng lahat.

Malinaw na naipakita nina Governor Tan, Vice Governor Tan II, at Barangay Chairman Uddin na ang tunay na layunin ng pamumuno ay hindi lamang ang pagtatayo ng mga imprastraktura kundi ang pagbibigay ng tunay na malasakit at kalinga sa mamamayan.