IPINAHAYAG ni Chairman Emeritus Dr. Jose Antonio Goitia ang kanyang buong suporta sa Armed Forces of the Philippines (AFP) at Philippine Coast Guard (PCG) sa gitna ng mga batikos at alegasyong bumabalot sa kanilang katapatan.

“Ang ating mga sundalo at coast guard ay naglilingkod hindi para sa pulitika o para sa ibang bansa, kundi para sa sambayanang Pilipino,” diin ni Goitia. “Ang pagdududa sa kanilang katapatan nang walang patunay ay insulto sa bawat Pilipinong nagsasakripisyo para sa bayan.”

Nagpahayag si Goitia kasunod ng palitan ng pahayag nina Rep. Paolo “Pulong” Duterte at PCG Spokesperson Commodore Jay Tarriela, matapos ihayag ni Duterte ang hinala na may impluwensya umano ng CIA at Estados Unidos sa mga polisiya ng depensa ng bansa — na agad pinabulaanan ni Tarriela bilang “divisive noise.”

Ayon kay Goitia, ang ganitong mga paratang ay nakasisira sa pagkakaisa sa panahong dapat nagkakaisa ang mga Pilipino para ipagtanggol ang West Philippine Sea.

“Hindi malasakit sa bayan ang pagbibintang sa ating mga tagapagtanggol. Ang tunay na mamamayan ay nagbibigay-suporta, hindi paninira,” ani Goitia.

Dagdag pa niya, ang disimpormasyon ay isa sa “pinakamapanganib na sandata” na tahimik na sumisira sa tiwala ng publiko sa pamahalaan.

“Hindi natin mapangangalagaan ang ating karagatan kung ang laban ay sa pagitan ng mga Pilipino mismo,” babala niya.

Binigyang-pugay din ni Goitia ang AFP at PCG sa kanilang tapat at tahimik na paglilingkod, sa kabila ng mga kasinungalingang ibinabato laban sa kanila.

“Sa likod ng bawat ingay, patuloy silang naglilingkod nang may dangal at disiplina. Iyan ang tunay na diwa ng kabayanihan,” ani Goitia.

Hinimok niya ang publiko at mga lider na maging responsable sa paggamit ng kanilang boses, at iwasan ang mga salitang nagdudulot ng pagkakawatak-watak.

“Ang kalayaan sa pananalita ay hindi kalayaan mula sa pananagutan,” paalala ni Goitia. “Kapag pinoprotektahan natin ang ating mga tagapagtanggol, pinoprotektahan din natin ang Republika.”

Sa huli, nanawagan si Goitia na unahin ang bayan bago ang pulitika.

Si Dr. Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield (FDNY) Movement.

(JULIET PACOT)