NAGSAGAWA ang Philippine Sports Commission-Philippine National Anti-Doping Organization (PSC-PHI-NADO), sa pakikipagtulungan ng Philippine Olympic Committee (POC), kamakailan ng ‘virtual seminar’ sa Anti-Doping Regulations para sa mga atletang lalahok sa Tokyo Olympics.
Pinangunahan ni Dr. Alejandro Pineda, Jr., PHI-NADO head at Director ng Southeast Asia Regional Anti-doping Organization (SEARADO), ang mga detalye sa dapat gawin ng mga atleta at mga coach sa aspeto ng anti-doping bago at matapos ang kompetisyon.
Ang 2020 Tokyo Games, nabalam ng isang taon dahil sa COVID-19 pandemic, ay nakatakda sa Hulyo 23 hanggang Agosto 8.
Nakiisa sa talakayan ang ilang mga atleta at mga coach ng Philippine delegation sa Tokyo Games kabilang sina pole vaulter EJ Obiena at skateboarder Margielyn Didal.
Sa kasalukuyan ay 17 atletang Pinoy mula sa 11 sports na athletics, boxing, golf, gymnastics, judo, rowing, skateboarding, shooting, swimming, taekwondo at weightlifting ang nag-qualify sa quadrennial Games.
“Malaking bagay po ang ganitong seminar para aware po kami sa mga dapat naming iwasan na kainin at inuming supplement. Kailangan po talagang alam namin na hindi kami dapat basta umiinom lang ng vitamins at supplement without consulting our coaches, officials at expert sa PHINADO,” pahayag ng 23-anyos Cebu pride na si Didal.
Nagbigay ng kanyang opening remarks sa seminar si Philippine delegation to Tokyo Olympics Chef de Mission at Philippine Football Federation president, Mariano Araneta.
Ipinaliwanag ni Dr. Pineda ang tungkol sa listahan ng mga ipinagbabawal na gamot at substance na inilabas para sa 2021 Olympics, gayundin ang Code and International Standards, Doping Control Process, Registered Testing Pool at Therapeutic Use Exemptions.
“Education is the best and most effective tool in disseminating information drive about Anti-Doping,” giit ni Pineda. Ito aniya ang pinakamabisang armas ng isang atleta upang makaiwas na maging biktima.
“Sa Principle of Strict Liability: YOU, and only YOU, are responsible for what goes into your body,” ayon pa kay Pineda.
Bukod kina Obiena at Didal, swak din sa Tokyo Summer Games si 2016 Rio Olympics weightlifting silver medalist Hidilyn Diaz at kasamahang si Elreen Ando; gymnast Carlo Yulo; boxers Eumir Marcial, Irish Magno, Nesthy Petecio at Carlo Paalam; rower Cris Nievarez; taekwondo jin Kurt Barbosa; shooter Jayson Valdez; judoka Kiyomi Watanabe at sprinter Kristina Knott.
Pasok din ang tatlong golfers na sina U.S. Women’s Open champ Yuka Saso at kasama nito sa 2018 Asian Games team golf gold finish na si Bianca Pagdanganan, at Juvic Pagunsan.
Inaasahang mabibigyan din ng slots via universality sina swimmers Luke Gebbie, James Deiparine at two-time Olympian Jasmine Alkhaldi.
258
