NADAGDAGAN na naman ang bilang ng narerekober na mga armas ng Spear Troopers at Philippine National Police (PNP) mula sa Communist Terrorist Group (CTG) matapos ang isinagawang operasyon sa Barangay Bulala, Magallanes, Sorsogon, .

Ayon kay Lt. Col. Nelson B. Mico, Commanding Officer ng 22nd Infantry Battalion (22IB), ilang mga residente ang nagpaabot ng sumbong sa kanilang tropa hinggil sa mga nakatagong armas sa isang koprahan.

Isang joint AFP at PNP operation ang binuo at sa pangunguna ng Philippine Army 22^nd Infantry Battalion katuwang ang local PNP, ay sinalakay ang ang nasabing lugar,

Nasamsam dito ang tatlong M16 rifle, isang KG9, tatlong anti-personnel mines, mga bala, at iba pang mga kagamitang pang-propaganda.

Ayon sa mga nagsumbong, nabalitaan nila ang nangyaring pagbibigay ng impormasyon ng mga residente sa Barangay Calmayon sa Juban ng nakaraang mga araw, kaya nagkaroon din sila ng lakas ng loob na ituro ang nakatagong mga armas ng CTG.

Naniniwala si BGen. Aldwine Almase, Commander ng 903rd Infantry Brigade, dahil sa galit ng mga tao sa karahasang ginagawa ng CTG, kaya mas naging aktibo ang mga ito sa pakikipag-ugnayan sa mga awtoridad lalong-lalo na sa pagpapaabot ng mga sumbong ukol sa pinagtataguan ng mga teroristang grupo gayundin sa itinatago nitong mga armas.

Ayon kay Major General Alex Luna, Commander ng 9th Infantry (SPEAR) Division at Joint Task Force Bicolandia (JTFB), mas nagiging malinaw na sa mga Bicolano ang kanilang responsibilidad at importansya sa kampanya ng gobyerno laban sa insurhensiya.

“Kami po ay muling nagpapasalamat sa walang humpay na pakikipagtulungan ng mga Bikolano. Patotoo lamang ito na ayaw na at sawa na ang mga tao sa mga ginagawa ng mga teroristang grupo. Kami po ay umaasa na ang mga natitira pang mga miyembro ng CTG na nagpapakahirap sa bundok ay maliwanagan na, na sila ay isinusuplong na ng taong bayan. Umaasa po kami na sa pamamagitan nito ay madadagdagan pa sa mga susunod na araw ang mga bababa sa bundok upang boluntaryong sumuko at magbagong buhay,” ani MGen. Luna.

Nito lamang nakaraang Linggo, Setyembre 4, nang dalawang miyembro ng CTG ang boluntaryong sumuko, bitbit ang kanilang mga armas.

Samantala, mga dekalibreng armas, bala at pampasabog naman ang nasamsam ng pinagsamang pwersa ng sundalo’t pulis sa Barangay Calmayon, Juban Sorsogon dahil din sa sumbong ng mga residente. (JESSE KABEL)