CAVITE – Umabot sa 18 sabungero ang binitbit ng Cavite Police matapos na naaktuhan habang nagsasagawa ng tupada sa mismong  “Araw ng Pagkabuhay” at nasamsam ang P15,350 halaga ng pusta sa Dasmariñas City, noong Linggo ng hapon.

Sa ulat ng Cavite Police Provincial Police Office (PPO), isinagawa ang illegal gambling operation sa pagitan ng alas-11:40 kamakalawa ng umaga at alas-4:00 kamakalawa ng hapon sa magkahiwalay na lugar sa Dasmariñas City.

Dakong alas-11:40 kamakalawa ng umaga nang nagsagawa ng illegal gambling operation sa Excess Lot, Brgy. Zone 1-A, Dasmariñas City kung saan pitong sabungero ang dinampot at narekober sa lugar ang dalawang sasabunging manok, dalawang tari at P9,850 na pusta.

Tinatayang P5,500 na pusta ang narekober naman ng mga awtoridad, gayundin ang dalawang sasabunging manok at dalawang tari, nang dakmain ang 11 sabungero habang nagsasagawa ng tupada sa Excess Lot, Mabuhay 2000, Brgy. Paliparan 2, Dasmariñas City dakong alas-4:00 kamakalawa ng hapon. (SIGFRED ADSUARA)