CAVITE – Nabuking ang bangkay ng isang lalaking Chinese national sa loob ng isang sasakyan nang maaresto ang driver nitong isa ring Chinese makaraang mabangga ang dalawang motorsiklo sa Bacoor City sa lalawigang ito, noong Huwebes ng gabi.

Kinilala ang natagpuang bangkay na si Gou Zi habang ang suspek ay kinilalang si Shi Teng, kapwa Chinese national.

Ayon sa ulat ni P/SSgt. Marvin Rae Calaor ng Bacoor City Police Station, dakong alas-7:15 ng gabi nang madiskubre ang bangkay ng biktima sa loob ng isang Toyota Alphard na may plakang NDP 5343 na minamaneho ni Teng habang binabagtas ang Kalinisan Intersection, Radial Road, Brgy. Talaba 4, Bacoor City.

Nabatid sa imbestigasyon, ang biktima at suspek ay lulan ng nasabing sasakyan ngunit nagkaroon ang mga ito ng mainitang pagtatalo.

Humantong umano ang pagtatalo sa pananaksak ng suspek sa biktima gamit ang kutsilyo.

Ang insidente ay nasaksihan ng kanilang driver na si Kristian Joseph de Guzman y Pineda na sa matinding takot ay tumakbo palayo.

Habang pinaharurot naman ng suspek ang sasakyan sa direksyon ng Las Piñas subalit habang binabagtas ang lugar ay nabangga nito ang dalawang motorsiklo.

Sa puntong ito, pinara ng mga operatiba ng BTMD at PNP ang sasakyan kung saan nasilip nila ang duguang biktima sa loob nito.

Isinugod ang biktima sa Saint Dominic Hospital subalit idineklarang dead on arrival habang inaresto naman ng mga awtoridad ang suspek. (SIGFRED ADSUARA)