NADAKIP ng pinagsanib pwersa ng 1001st Infantry “Pag-asa” Brigade at Criminal Investigation and Detection Group (CIDG) XI sa ikinasang joint law enforcement operation ang umano’y notorious bombmaker ng Communist Terrorist Group (CTG) at dalawang kasamahan nito sa Tagum City noong Marso 9, 2022.

Kinilala ni BGen. Jesus P. Durante III, commander ng 1001st Brigade ang nadakip na bomb expert na si Victor P. Rollon, alyas Rico Rollon,

bomb maker ng Komisyong Mindanao (KOMMID) at Southern Mindanao Regional Committee (SMRC).

Habang arestado rin ang dalawang kasama nito na sina Christine Joy Adorza Dula, finance officer ng Weakened Guerrilla Front 3, Sub-Regional Committee 4, SMRC; at Chargelyn Monta Casquejo, political instructor, Pulang Bagani Command (PBC), Regional Operations Command (ROC), SMRC.

Si Rollon ay may standing warrant of arrest sa kasong murder at serious illegal detention habang si Dula ay wanted sa kasong rebellion and insurrection sa Tagum City. Si Casquejo naman ay wanted sa kasong homicide sa Lupon, Davao Oriental.

Samantala, napasuko naman ng 1003rd Infantry “Raptor” Brigade

katuwang ang 89th Infantry Battalion, ang tatlong miyembro ng Militiang Bayan (MB) na pawang nasa ilalim ng Sub-Regional Guerilla Unit (SRGU) ng SRC 5, SMRC sa Sitio Peroy, Brgy. Dagohoy, Talaingod, Davao Del Norte.

Kinilala ang mga sumuko na sina alyas “Enting”, vice commanding officer; alyas “Operator”, liaison officer ng Militiang Bayan (MB), may bitbit na M16A1 armalite rifle at mga bala, at isang alyas “ATO”.

Sumuko naman sa 56th Infantry “Tatag” Battalion ang 18-anyos na si alyas Wanwan, dating kasapi ng Iskwad Segunda, Platun Dos ng Guerilla Front Malayag, Sub-Regional Committee 2, North Central Mindanao Regional Committee, dala ang isang Colt M16A1 assault rifle. (JESSE KABEL)