BAHAGI ng paglalarawan na hindi nakalilimot ng kanilang utang na loob ang South Korea sa Pilipinas, isang Filipino Korean War veteran ang pinagkalooban ng pabahay sa Laguna ng South Korea Army.

Bilang katibayan ng matatag na pagkakaibigan ng Pilipinas at South Korea, isang housing unit ang ipinagkaloob kay Philippine Expeditionary Force to Korea (PEFTOK) veteran, Sgt. Florendo Benedicto (Ret.) na inilaan para sa Korean War veterans, sa ginanap na awarding ceremony sa Barangay Parian, Calamba, Laguna noong Miyerkoles.

Pinangunahan nina Ambassador of the Republic of Korea in the Philippines Lee Sang-Hwa at ROKA Personnel Command Commander Maj. Gen. Shin Eun-Bong ang pagkakaloob ng pabahay sa 93-anyos na PEFTOK veteran.

Si Sgt. Benedicto ay sumabak sa Battle of Yultong at nagsilbi mula sa unang araw hanggang sa pinakahuling araw ng Korean war.

Kinatawan naman ni 2nd Infantry “Jungle Fighter” Division Commander Maj. Gen. Ramon P. Zagala, ang Philippine Army sa nasabing kaganapan at nagpahatid ng taos-pusong pagbati kay Ret. Sgt. Benedicto at sa pamilya nito.

Pinasalamatan din ni Maj. Gen. Zagala ang South Korean government sa pag-angat sa morale at kagalingan ng PEFTOK veterans, may 75 taon matapos ang Korean War.

“Every time we honor a veteran, we strengthen the very foundation of our profession. The belief that service to country transcends time, place, and generation,” pahayag ng 2ID Commander.

“The Philippine Army leadership recognizes the significance of honoring the sacrifices of veterans who showed resilience, bravery, and unwavering spirit, while also fostering the longstanding army-to-army relationship between partner nations,” dagdag pa ni General Zagala.

(JESSE RUIZ)