Ni Tracy Cabrera

KALIBO, Aklan — Nabigo si incumbent Aklan District II representative Teodorico ‘Nonong’ Haresco Jr. sa kanyang reelection bid sa kanyang distrito matapos maungusan lang ng mahigit tatlong libong boto ng kanyang karibal na si Florencio ‘Joeben’ Miraflores ng Nationalist People’s Coalition (NPC).

Sa partial count ng nakakuha si Miraflores ng 88,795 boto habang si Haresco nama’y hindi nakahabol dito sa bilang na 85,253 boto na lubhang napakalayo sa 285 boto ng ikatlong aspirante bilang congressman na si Felicisimo ‘Jun’ Tanumtanum ng Ibajay.

Matatandaang inireklamo si Haresco ng pamimili ng boto sa Comelec ng dalawang barangay captain na sina Henry Olid at Shirly Lagradante ng bayan ng Makato.

Bukod dito, inuugnay din ang kongresista sa pekeng special allotment release order (SARO) scam noong 2014 na kung saan inirekomenda siyang kasuhan sa Department of Justice (DoJ) ng National Bureau of Investigation (NBI), kasama ang staff member ni Zamboanga City representative Lilia Macrohon-Nuno at apat pang iba.