GEN Z TALKS ni LEA BAJASAN

KAMAKAILAN, nagbato si Vice Ganda ng biro tungkol sa “Jet ski holiday” na nagpatawa sa mga nanonood at nagpainit ng usapan sa social media. Hindi lang basta imbento ang linya — galing ito sa isang viral na TikTok meme. Ang orihinal na tunog ay mula sa isang British travel ad na may boses na masayang nagsasabing “Nothing beats a Jet2 holiday” kasabay ng kantang Hold My Hand ni Jess Glynne. Sa TikTok, ginamit ito ng mga tao sa nakatatawang paraan, isinasabay sa mga video ng palpak na bakasyon, magulong biyahe, o eksenang sadyang pinapalala. Ang contrast ng masayang jingle at magulong eksena ang nagpabantog dito.

Pinalitan ni Vice ang salitang “Jet2” ng “jet ski” at ginamit ito sa kanyang set sa Superdivas concert. Agad namang na-gets ng mga tao ang biro. Isang magandang halo ito ng global internet humor at lokal na wit — parang meme remix na live sa entablado. Hindi nagtagal, kumalat ang clip online at muli itong binuhay ng netizens.

Pero hindi lahat ay natawa. May ilan na nagsabing ito’y kawalang-galang. May iba pang nagsabing hindi dapat gawing biro ang mga politiko. Pero ganito talaga gumagana ang masayang bahagi ng komedya — ang kakayahang gawing katawa-tawa ang mga pampublikong pangyayari.

Matagal nang kilala si Vice Ganda sa pagiging mahusay bumasa ng tao at sa eksaktong tiyempo ng pagpapatawa. Tumalab ang “jet ski holiday” na biro nito dahil absurd ito pero pamilyar. Ganito ang satire: kukunin ang isang bagay na kilala na ng lahat at hihilahin ito sa nakatatawang direksyon. Sa ganitong paraan, napapaisip ang tao kahit natatawa.

Hindi bago ang political humor. Mula sa entablado hanggang sa telebisyon, matagal nang ginagawang materyal ng mga komedyante ang kilos, pahayag, at anyo ng mga lider. Isa itong paraan para mas madali nating maproseso ang seryosong mga usapin.

May ilang nagtanggol kay Vice na sinabing madalas ding magbiro ang ilang politiko. Totoo man ito, hindi ito dapat maging pangunahing rason para ipagtanggol siya. Hindi kailangan ng komedya ng permiso o precedent para mag-exist. May lugar ito sa isang malayang lipunan at hindi kailangang maghintay ng pahintulot bago pumitik sa mga makapangyarihan.

Ang “jet ski holiday” moment ay hindi atake. Hindi ito paninira. Isa itong eksenang pinalaki para sa aliw. Ang entablado ay hindi korte, at ang punchline ay hindi polisiya. Ang nangyayari sa isang comedy set ay hindi dapat ituring na literal na katotohanan. Ito ay repleksyon ng reyalidad na sinala sa pamamagitan ng biro.

Mahalaga ang ganitong klase ng komedya dahil binibigyan tayo nito ng kakayahang tumawa sa mga makapangyarihan nang walang takot. Ipinapaalala nitong tao rin ang mga lider at hindi ligtas sa usapan ang kanilang mga salita at kilos. Ang katotohanang konektado pa ito sa isang global meme ay patunay na may sariling buhay ang humor lampas sa pinanggalingang venue.

Ang trabaho ni Vice Ganda ay maglibang, at sa gabing iyon, nagawa niya ito nang mahusay. Ang “jet ski holiday” joke ay mabilis, matalim, at tumama sa punto. Pinatawa nito ang venue, kumalat online, at naging bahagi ng mas malaking biro sa internet. Ang linya sa pagitan ng komedya at bawal ay dapat manatiling malayo sa mga biro na gaya nito at doon nga ito dapat manatili.