PINAIIMBESTIGAHAN ni LTO Chief Assistant Secretary Atty. Vigor D. Mendoza II ang 40 district offices ng ahensya kasunod ng intelligence reports kaugnay ng ilegal umanong paglilipat ng pagmamay-ari ng mga sasakyang de-motor na inilarawan ng Pambansang Pulisya bilang technical carnapping.

Sinabi ni Mendoza na maglalabas siya ng abiso para ipaliwanag sa lahat ng mga pinuno ng district offices ang kumpirmadong intelligence reports ng ilegal na paglilipat ng pagmamay-ari ng mga sasakyang de-motor.

Nalaman ni Mendoza sa gitna ng patuloy na koordinasyon ng LTO sa Philippine National Police (PNP) para ipatupad ang mga patakaran sa trapiko at habulin ang mga indibidwal at grupong sangkot sa mga ilegal na aktibidad gamit ang mga sasakyang de-motor.

Sa coordination meeting, napag-alaman na ilang LTO district offices ang sangkot sa hindi awtorisadong pagproseso ng Cancellation of Transfer of Ownership at Duplication of Certificates of Registration.

Ang modus, ayon sa LTO chief ay nagsasangkot ng mga narekober na sasakyan na ilegal na inilipat sa mga bagong may-ari, na may mga bagong duplicate na Certificate of Registration na inisyu kasama ng wastong dokumentasyon upang gayahin ang isang balidong paglilipat ng pagmamay-ari.

“Ipinaalam na namin kay DOTr Secretary Vince Dizon ang modus na ito at malinaw ang kanyang tagubilin, na tukuyin at tiyakin na airtight criminal at administrative charges ang maisasampa laban sa mga sangkot sa ilegal na aktibidad na ito,” ani Asec Mendoza.

“Hindi natin hahayaang lumipas ito. Hindi natin hahayaan na magamit ang LTO sa mga ilegal na aktibidad tulad nito,” pangako pa nito.

Batay sa datos ng LTO, 15 sa ilegal na paglilipat ng pagmamay-ari ng mga sasakyang de-motor na nasamsam sa mga operasyon ng pulisya ay nangyari sa CARAGA Region; walo sa Rehiyon 9; tig-apat sa Rehiyon 2 at Rehiyon 11; tig-dalawa sa Rehiyon 1, Rehiyon 3 at Rehiyon 10; at tig-isa sa Region 4A, Region 8 at sa Cordillera Administrative Region.

Idinagdag pa ng hepe ng LTO na ang mga kasong administratibo na may kasamang dismissal penalties ay maling pag-uugali sa ilalim ng Civil Service at LTO Memorandum Circular No. MC-91-137 na may petsang 6 Hunyo 1991, at paglabag sa LTO Citizen Charter.

(PAOLO SANTOS)