IPINAG-UTOS ng Bureau of Immigration (BI) sa kanilang inspectors na nakatalaga sa international airports na higpitan ang pagsasala sa mga Pilipino na paalis papuntang Japan bilang bahagi ng kasalukuyang pagsisikap ng ahensya na masawata ang illegal recruitment at human trafficking.

Sa memorandum kamakailan, iniutos ni Immigration Commissioner Jaime Morente sa Immigration inspectors sa ports of exit ang “due attentiveness” para sa Filipino passengers na papuntang Japan.

Iniutos din ni Morente sa BI personnel na ipatupad ang dobleng pag-iingat sa pagsasala sa departure ng mga Pilipino na may visas para sa ‘intra-company transferee, short-term visitor, student, and engineer specialist in humanities and international services’.

Sinabi niya na ginagamit ang nasabing visas ng ilang mga pasahero na mananatili lamang sa Japan sa maikling panahon ngunit ang tunay na layunin ay magtrabaho sa nabanggit na bansa.(JOEL O. AMONGO)