PINAGKAKAKITAAN ng ilang tiwaling private hospitals ang mga personal protective equipment (PPEs) na dino-donate sa kanila ng iba’t ibang grupo dahil kasama ito sa sinisingil nila sa mga pasyente ng Coronavirus Disease 2019 o COVID-19.
Ito ang isiniwalat ni BH party-list Rep. Bernadeth Herrera kaya nanawagan ito sa Department of Health (DOH) at Inter-Agency Task Force for the Management of Emerging Infectious Diseases (IATF) na ipatigil ang kalakarang ito ng mga pribadong pagamutan.
“We call on the DOH and IATF to punish private hospitals that are taking advantage of the current situation by charging patients for donated PPEs that were either provided by the government or donated by the private sector,” ani Herrera
Magugunita na maraming organisasyon at grupo ang nag-donate ng mga PPE sa mga private at public hospital upang maproteksyunan ang mga frontliner.
Gayunpaman, kasama sa hospital bills ng mga COVID-19 patients ang ginamit na PPEs ng mga frontliner.
“This is clearly profiteering. I wish to remind hospitals involved in this unfair practice that it is immoral and unacceptable for you to take advantage of this public health crisis,” ani Herrera.
Nabatid sa mambabatas na umaabot sa P378,000 ang bill ng mga pasyente sa PPEs pa lamang kada linggo dahil 12 hanggang 18 PPEs sets aniya ang nagagamit ng mga frontliner kada araw.
Nagkakahalaga umano ng P1,500 ang singil ng ilang hospital sa bawat set ng PPEs habang sa ibang pribadong pagamutan naman aniya ay umaabot ito sa P3,000 hanggang P4,000 kaya hindi nakapagtataka na milyon piso ang hospital bills ng isang COVID-19 patient.
“For doctors who are using donated PPEs, maybe you can tell relatives of your patients to check the charges. Inform them that the gears are not to be charged because what you are wearing is donated,” anang mambabatas. BERNARD TAGUINOD
188 
