SINAMPAHAN ng Quezon City Police District (QCPD) ng kasong 2 counts ng murder ang pitong suspek sa pamamaril na ikinamatay ni dating National Center for Mental Health (NCMH) Director Roland Cortez y Luyun at kanyang driver na si Ernesto dela Cruz y Ponce, dakong alas-7:00 ng umaga noong Hulyo 27, 2020 sa Cassanova Drive kanto ng Tandang Sora Ave., Brgy. Culiat, Quezon City.

Ayon kay QCPD director, P/Brigadier General Ronnie Montejo, ang 2 counts ng murder ay isinampa sa QC Prosecutor’s Office nitong Martes laban sa anim na mga suspek at isa pang John Does.

Kinilala ang mga kinasuhan na sina Sonny Sandicho y Mitra, 42; Clarita Avila y Mendoza, legal age, National Center for Mental Health (NCMH) chief administrative officer; George Serrano, legal age, empleyado ng NCMH; Harly Pagarigan, legal age, empleyado ng NCMH; Roman Eugenio y Balaan, 44, negosyante; Cristina Riego y Mitra alyas Ma. Cristina Riego Dela Cruz, legal age, negosyante, at Edieson Riego y Mitra, 26, online seller.

Ayon kay P/BGen. Montejo, isinampa ang kaso laban sa mga suspek base sa mga ebidensiyang nakalap ng mga imbestigador ng Criminal Investigation and Detection Unit (CIDU), sa pamumuno ni P/Maj. Elmer Monsalve.

Samantala, ang isa pang suspek na patuloy na nakalalaya ay binigyan ng mga awtoridad na pagkakataon na patunayan sa korte na inosento siya sa kaso. (JOEL O. AMONGO)