INALIS na ni Pangulong Rodrigo Duterte, Martes ng gabi, ang suspensiyon ng Lotto operations ng Philippine Charity Sweepstakes Office (PCSO) — epektibo agad.

“As per the advice of Executive Secretary Salvador C. Medialdea, the suspension of Lotto operations has been ordered lifted by the President,” sabi ni presidential spokesperson Salvador Panelo sa isang statement.

Gayunman, nilinaw ni Panelo na ang iba pang gaming operations ng PCSO — tulad ng Small-Town Lottery (STL), Keno, at Peryahan ng Bayan (PNB) — ay nananatiling suspendido.

Mananatili aniyang suspendido ito hangga’t nagsasagawa ng imbestigasyon kaugnay sa ilegal na aktibidades at corrupt practice na may kinalaman dito. Hihintayin din na masuri pang mabuti ng Office of the President (OP) ang resulta ng nasabing imbestigasyon.