SOLUSYON HINDI IMPORTASYON

TUMAAS na ang presyo ng mga cake, pastelerya at ilang tinapay dahil sa pagmahal ng mga sangkap tulad ng asukal at itlog.

Pagtaas ng presyo ng kanilang produkto ang sagot ng grupo ng mga panadero dahil hindi naman nila pwedeng bawasan ang paggamit ng itlog at asukal dahil ito ang mga pangunahing sangkap sa mga produkto.

Muli namang nilinaw ng Samahang Industriya ng Agrikultura na ang pagtaas ng presyo ng itlog ay dahil pa rin sa epekto ng bird flu.

Nagpiket naman ang ilang grupo sa harapan ng Department of Agriculture sa Quezon City nitong Lunes, upang hilingin ang agarang mga solusyon sa pagsipa ng presyo ng pagkain, suporta para sa lokal na produksyon ng pagkain at ihinto ang importasyon. Ipinagduldulan nila sa DA ang kawalan ng aksyon ng ahensya sa pagsirit ng presyo ng mga bilihin tulad ng sibuyas, asukal at itlog.

Sinabi ni Pangulong Ferdinand Marcos Jr. na hindi inuupuan ng gobyerno ang problema sa sibuyas at asukal, at tutulungan ang mga magsasaka para mapalakas ang produksiyon at hindi na mag-angkat sa ibang bansa.

May solusyon siya para hindi kapusin ng suplay ng asukal at hindi sumipa ang presyo nito sa merkado. Ito ay ang dalawang buwang buffer stock ng asukal.

Ayon sa Pangulo, ang buffer stock ang sasalo upang hindi muling maranasan ng mamamayan ang kapos na supply at mataas na presyo ng asukal.

Ang tanong: Mawala na kaya ang haka-haka sa presyo at sa sapat na suplay ng asukal?

Ang buffer stock ay ang pag-iimbak ng mga pangunahing kalakal sa panahon na mababa o pabago-bago ang presyo, at ipinamamahagi sa panahong mataas ang bilihin upang maging matatag ang merkado.

Ano ang garantiya? Baka makinabang dito ang kartel o magkaroon ng oligopolyo – isang estruktura ng pamilihan na may maliit na bilang ng bahay-kalakal na nagbebenta ng magkakatulad na produkto. Magkakaroon pa rin ng manipulasyon sa presyo, pagbebenta at produksyon.

Kung mahina ang institusyon ng bansa, at walang sistema at mekanismo para panagutin ang lumalabag, paano masisiguro na matuwid na maipatutupad ang buffer stock?

Palakasin ang produksyon at huwag umasa sa importasyon ang mainam na solusyon sa patuloy na pagtaas ng mga bilihin.

Hindi naman nasasanay ang konsyumer sa importasyon. Sinasanay lang.

16

Related posts

Leave a Comment