CAVITE – Tinatayang P340,000.00 halaga ng umano’y shabu ang nasamsam at nagresulta sa pagkakaaresto sa isang hinihinalang tulak na nasa listahan ng High Value Individuals (HVIs) ng pulisya, sa isinagawang buy-bust operation sa Dasmariñas City noong Biyernes ng gabi.

Nahaharap sa kasong paglabag sa Section 5 at 11 ng Republic Act 9165 o Comprehensive Dangerous Drugs Act of 2002, ang suspek na si alyas “Vic”, 40 ng Dasmariñas City.

Ayon sa ulat, bandang alas-8:00 ng gabi, nagsagawa ng buy-bust operation ang mga operatiba ng Dasmariñas Component City Police Station sa Brgy. H2, Dasmariñas City na nagresulta sa pagkakaaresto sa suspek.

Nasamsam sa suspek ang humigit kumulang 50 gramo ng hinihinalang shabu na may standard drug price na P340,000.00 at ang buy-bust money na ginamit sa operasyon.

“This successful operation reflects our continuing commitment to rid our communities of illegal drugs. We will remain firm and consistent in enforcing the law and protecting our people from individuals who threaten public safety,” ayon kay PCol. Ariel R. Red, PD, Cavite PPO.

(SIGFRED ADSUARA)