NASAMSAM ng Bureau of Customs (BOC)–Port of Cebu ang 247 branded mobile phones mula sa China na tinatayang nagkakahalaga ng P1,679,617.

Ang labindalawang pakete ay nasabat noong Enero 31, 2026 sa Subport of Mactan matapos ideklara bilang personal effects ngunit napansing kahina-hinala sa x-ray images.

Sa isinagawang physical examination kasama ang Customs Intelligence and Investigation Service, Enforcement and Security Service, at X-ray Inspection Project, nadiskubre ang mga hindi idineklarang commercial quantity ng cellphone na hindi tugma sa deklarasyon.

Dahil dito, nagpalabas si BOC-Port of Cebu District Collector Alexandra Yap-Lumontad ng Warrant of Seizure and Detention laban sa shipment dahil sa paglabag sa Customs Modernization and Tariff Act.

Ayon naman kay Subport of Mactan Port Collector Gerardo A. Campo, nabuking ang smuggling modus bunga ng mas mahigpit na koordinasyon at bagong inspection protocols sa pantalan.

(JOCELYN DOMENDEN)