MALAKI ang naitutulong ng election season sa ekonomiya ng bansa dahil gumagastos ang mga pulitiko at mga political party para magpakilala sa mga botante at makuha ang suporta ng mga tao.

Tiyak din na lalong gagana ang ekonomiya dahil sinasabayan ng pagpapakilala ng mga kandidato ang Christmas season na ang mga tao, kahit mahirap ang kalagayan sa buhay, ay sineselebra ang kapanganakan ng Poong Jesus Cristo kahit anong mangyari.

Kung ang Pilipinas ay kilala na may pinakamahabang Christmas season, mukhang nakikilala rin tayo sa mundo na may pinakamabahang election season at kapag nagsabay ang dalawang ito, maganda ang tama sa ekonomiya ng bansa.

Siguro pansin nyo, may reelectionist senators ang nagpaparamdam sa simula pa lamang ng taong ito sa pamamagitan ng mga radio at television advertisement na kunwari nangangamusta at ipinangangalandakan ang kanilang nagawang batas daw.

Kung magagawi kayo sa South Luzon at North Luzon Expressway, halos tadtad na ng mukha ng mga pulitikong tatakbo sa susunod na ­eleksyon ang buong highway. Hindi biro ang pera sa billboard ads na ‘yan ha.

May presidential candi­date nga kahit saan ka ­lumi­ngon, mapakanan o kaliwa ay may billboard siya pero nasa dulo ang kanyang pangalan sa mga presidential survey (sayang ang pera).

Hindi lang mga presidential kundi senatorial ­candidate ang makikita mo sa mga highway at maging ang mga partido ng mga ­party-list group na guma­gastos sa mga naglalakihang billboard sa mga expressway.

Tulad ng sabi ko, hindi biro ang perang ginagastos dyan sa mga billboard at buhay na buhay rin ang mga printing press dahil kanya-kanyang pagpapaimprenta na ng tarpaulins.

Ibig sabihin, bumubuhos ang pondo sa eleksyon at magpapatuloy ‘yan hanggang sa Mayo at kapag bumu­buhos ang pera ay iikot ‘yan, madadagdagan ang may pansamantalang trabaho at gagana ang ekonomiya ng bansa.

Hindi lang ‘yan, tiyak din na bubuhos ang pera bago ang araw ng eleksyon dahil hindi pa rin maiiwasan yata na may mga pulitiko ang namimili ng boto para ­masiguro ang kanilang panalo.

Dahil sumabay ang ­eleksyon sa Christmas season na magkakaroon ng extra money ang mga tao dahil sa mga bonus, lalo na ang mga manggagawa ay marami ang maibebentang produkto.

Nitong buwan pa lamang na ito, ang daming namimili ng Christmas decors tulad ng Christmas lights. Bihira kang makakita ng bahay na walang Christmas décor.

Naghahanda rin, kahit ang mga tulad naming mahirap sa Pasko para magregalo sa mga kaanak, inaanak at kaibigan kahit papaano kaya gagastos at gagastos dahil naging kultura na ito ng Pinoy.

Hindi lang Christmas Day ang pinaghahandaan kundi ang New Year’s Eve rin kahit ng mga ordinaryong pamilya dahil naging ­tradisyon na ito sa ating bansa kaya ­maraming food products ang maibebenta.

Dahil d’yan, buhay na buhay ang manufacturing sector at lahat ng negosyo sa pagkain kaya buhay na buhay d’yan ang ekonomiya ng bansa.

Sana wala nang katapusan.