CAVITE – Nadakip ang isang isang senior citizen matapos holdapin ang pasahero na sakay ng kanyang motorsiklong “Bokyo” sa Tagaytay City noong Martes ng hapon.

Nahaharap sa kasong ‘robbery with force and intimidation against a person’ ang suspek na si Lito Gubot y Unyot, 60, may asawa, Bokyo driver, ng Brgy. San Jose, Tagaytay City, matapos na ireklamo ng biktimang si Aileen Montecalvo y Belostrino, 25, may asawa, ng Tagaytay City.

Ayon sa salaysay ng biktima, sakay siya sa Bajaj (Bokyo) na may body number 1365, na minamaneho ng suspek dakong alas-3:46 ng hapon.

Ngunit pagdating sa SVR Road, sakop ng Brgy. Mag-asawang Ilat, Tagaytay City, tinutukan siya ng suspek ng patalim at ng kasamang babae nito, saka puwersahang kinuha ang kanyang wallet na may lamang P1,200 cash.

Pagkaraan ay iniwan umano siya ng mga suspek sa Dominican Road sa Brgy. Tolentino West, Tagaytay City.

Personal naman siyang humingi ng tulong sa Tagaytay City Police na nagsagawa ng hot pursuit operation na nagresulta sa pagkakaaresto sa senior citizen na positibong kinilala ng biktima.

(SIGFRED ADSUARA)