BIGO ang mga tauhan ng Senate Sergeant at Arms na maaresto si dating Budget Undersecretary Christopher Lao na una nang na-cite for contempt dahil sa pang-iisnab sa pagdinig ng Senate Blue Ribbon Committee sa procurement ng umano’y overpriced na medical supplies.
Sinabi ni OSAA Chief, General Rene Samonte, sinubukan nilang puntahan ang address ni Lao sa Metro Manila subalit hindi nila ito natagpuan.
“We attempted to serve the arrest order for Atty. Lao in his known address in Metro Manila, but the Residential condo was unoccupied and reported to be in another individual’s name,” pahayag ni Samonte.
Nangako naman si Samonte na muling susubukang arestuhin si Lao sa iba pang mga address nito.
“We will serve again in at least 4 given addresses in Mindanao and Visayas, within the next coming days after completing administration and logistical requirements,” paliwanag pa ni Samonte.
Sa huling pagdinig ng Senado, sinabi ni Senate Blue Ribbon Committee Chairman Richard Gordon na hindi na government official si Lao at hindi na ito saklaw ng kautusan ni Pangulong Rodrigo Duterte na nagbabawal sa Executive department officials at mga empleyado na dumalo sa Senate hearing.
Nauna nang ipinaaresto ng Senado ang magkapatid na Pharmally executives na sina Mohit at Twinkle Dargani na nabigo ring madakip ng Senado. (DANG SAMSON-GARCIA)
189 
