MULING iginiit ni Sen. Cynthia Villar ang panukalang ipagbawal ang “single-use plastic” sa pagpupulong ng mga pinuno ng mga ahensiyang naatasang maglinis at mag-rehabilitate sa Manila Bay.

Sa 2nd Principals’ Meeting at Conference ng Manila Bay Task Force na idinaos sa Diamond Hotel, Manila, binigyan diin ni Villar na ang plastic waste ang pinaka-nakaaalarmang environmental issue.

“Ang plastic ang isa sa pinakamalubhang nakapipinsala sa ating kapaligiran at pumapatay sa mga yamang dagat. Alam natin lahat iyan dahil sa lahat ng cleanups, puro plastic wastes ang nako-collect natin,”ayon kay Villar.

Iginiit din ni Villar, chairperson ng Senate Committee on Environment and Natural Resources, na sa kabila ng pagbabawal ng mga siyudad sa paggamit ng plastic, napakalaki pa rin ng ating problema sa plastic.

Bunga nito, naniniwala ang senador na kailangan ang nationwide ban sa plastic na suportado naman ni President Rodrigo Duterte.

Sinabi rin ng senador na magsasagawa siya ng public hearing sa Senate Bill 333 o ang Single-Use Plastic Product Regulation Act na kanyang inakda. Layunin nito na i-regulate ang manufacturing, importasyon at single-use ng plastic products.

Sa ilalim din ng panukala, ipagbabawal ang single-use plastics sa food establishments, mga tindahan, merkado at retailers.

Pinaalalahanan din ang consumers na gumamit ng reusable materials at ang manufacturers na kolektahin, mag-recycle at itapon ang single-use plastics na nasa merkado. Hindi na rin papayagan ang importasyon ng single-use plastics.

“We also seek to amend the 20-year-old Solid Waste Management Act to include the implementation of Extended Producer Responsibility which will require the manufacturers using plastic materials in their packaging to be responsible in recovering the plastic wastes,” dagdag pa ni Villar.

Idinaos ang principals’ meeting bago pa ang pagdiriwang ng first anniversary ng Battle for Manila Bay ngayong araw. Itinampok sa pagpupulong ang mga nagawa ng task force gaya ng pagpapababa sa fecal coliform levels sa ilang bahagi ng  Manila Bay mula bilyon at ang matagumpay na relokasyon ng informal settlers.

Pinasalamatan ni Environment Secretary at Manila Bay Task Force Chairperson Roy Cimatu ang mga kasapi ng task force at ang mga taong araw-araw na naglilinis sa Manila Bay.

“What we started here is the beginning of something transformative for the Philippines–a true revolution. Let the battle for Manila Bay rage on!” ayon kay Cimatu.

Itinatag ang Manila Bay Task Force sa ilalim ng Administrative Order 16 na nilagdaan ni Pangulong Duterte noong February 19, 2019.

Ang AO ay base sa writ of continuing mandamus na ipinalabas ng Supreme Court noong December 2008. Inuutusan dito ang 13 agencies at private entities na maglinis, ayusin at panatiliing malinis amg  tubig ng Manila Bay. (ESTONG REYES)