Ni ANN ENCARNACION
NADAGDAGAN ng dalawa ang Filipino athletes na sasabak sa 32nd Olympics na gaganapin sa Tokyo sa Hulyo 23 hanggang Agosto 8.
Opisyal nang ipinahayag ng Federation Internationale de Natation (FINA) ang pagkakasama nina swimmers Remedy Rule at Luke Gebbie sa quadrennial Games, kaya mula sa 17 ay 19 na ang pambato ng bansa sa Tokyo.
“We would like to congratulate Remedy and Luke for earning the right to represent Philippine swimming at the 2020 Olympic Games,” sabi ni Philippine Swimming Inc. president Lani Velasco, na pinasalamatan ang Philippine Sports Commission (PSC) sa suporta sa mga atleta.
Sina Gebbie at Rule ay ginawaran ng Universality Places para makasali sa Summer Games, base sa tradisyon na mandatory sports para lahat ng bansa ay may kinatawan sa Olympics.
Ayon pa rin sa FINA, si Gebbie ay lalangoy sa men’s 50 at 100-meter freestyle, habang si Rule ay sa 200m butterfly at freestyle events.
Si Rule ay double silver medalists noong 2019 Southeast Asian Games. Siya ang kasalukuyang may hawak ng Philippine record sa women’s 200m butterfly na 2:9.58 minuto na naitala niya sa TYR Pro Swim Series sa Des Moines, Iowa noong Marso 2020.
Si Melbourne, Australia based Gebbie, bronze medalist sa 30th SEAG, ang may hawak naman sa national record sa 50m freestyle na 22.57 seconds.
Ang iba pang Pinoy na pasok sa Tokyo Olympics ay sina pole vaulter EJ Obiena; sprinter Kristina Knott; gymnast Caloy Yulo; boxers Felix Eumir Marcial, Carlo Paalam, Nesthy Petecio at Irish Magno; rower Cris Nievarez; shooter Jayson Valdez; skateboarder Margielyn Didal; taekwondo jin Kurt Ryan Barbosa; at weightlifters Hidilyn Diaz at Elreen Ando.
134
