POSIBLENG maging hudyat ng pagpasok ng tag-ulan ang pagragasa ng bagyong Dante na lalo pang lumakas habang nasa silangang bahagi ng Pilipinas.

Ayon sa PAGASA, pasisimulan na nito ang maulang panahon at paglakas ng hanging habagat.

Kahapon, isang matandang lalaki ang nasawi nang magdulot ng baha ang bagyong Dante sa maraming lugar sa Davao Region, ayon sa ulat ng National Disaster Risk Reduction Management Council.

Sa inisyal na ulat, natagpuan ang bangkay ng biktimang si Porperio Sabate Pilapil, 71-anyos, ng Davao del Sur makaraang tangayin ng rumaragasang tubig baha.

Ayon sa Malalag Municipal Police Station, pauwi ang biktima sakay ng kanyang bisekleta noong Linggo ng hapon at tinangkang tumawid sa baha ngunit tinangay ito.

Nabatid pa sa ulat ng PAGASA, noong Linggo pa nilubog ni ‘Dante’ na nuon ay isa pa lamang tropical depression, ang rehiyon kabilang ang ilang bahagi ng Davao Region na Davao del Sur at

Davao del Norte. Nitong Lunes naramdaman sa ilang bayan ng Caraga, Soccsksargen, Bukidnon, at Misamis Oriental ang bagyo.

Kinailangan ding suspindehin kahapon ang klase sa mga paaralan sa ilang bayan sa Davao de Oro dahil sa masamang panahong dala ng bagyo.

Bahagyang lumakas nitong umaga ng Lunes ang bagyo, na namataang nasa bahagi ng Philippine Sea, 515 kilometro ang layo sa Davao City, base sa pagtataya ng  PAGASA.

Pinagtulungang iligtas ng mga pulis, barangay at volunteer rescuer ang mga residente sa mga binahang lugar.

Bandang alas-8 kamakalawa ng gabi, 65 pamilya ang inilikas mula sa Bulusan at Taal sa Bangkal.

Sa ulat naman ng Davao City government, inilikas din ang higit 20 pamilya sa mga barangay ng Bunawan Proper, Mintal at Bago Aplaya matapos umapaw ang mga kalapit na ilog at creek.

Inaasahang magdadala pa ng mga pag-ulan ang Bagyong Dante sa ilang lugar sa Mindanao. (JESSE KABEL)