ASAHANG tuluyan nang matutuldukan ang suhulan at pambabarako ng mga tiwaling kawani kaugnay ng mga pumapasok at lumalabas na kargamento pagsapit ng 2025, ayon mismo sa isang opisyal ng Bureau of Customs (BoC).
Sa isang pahayag, hayagang sinabi ni Customs Associate Commissioner Vincent Philip Maronilla na matatapos na ng BOC ang programang full automation na aniya’y may kalakip at garantiyang iwas katiwalian bunsod ng pagwawaksi ng mga face-to-face transactions sa pagitan ng kanilang mga kawani at ng mga importers at customs brokers.
Aniya, malaking bentahe ang full automation ng kawanihan lalo pa’t malaking bahagi aniya ng kita ng ahensya ang napupunta sa mga tiwaling karaniwang sinusuhulan kapalit ng pabor kaugnay ng mga pumapasok at lumalabas na kargamento sa kanilang pasilidad.
Paglilinaw pa ng opisyal, bagama’t sa 2025 pa tuluyang makikita ang buting dala ng programang full automation na pinondohan ng $84 milyon ng World Bank, maraming aspeto na ng kanilang operasyon ang nagpapatupad ng minimal face-to-face transactions gamit ang makabagong teknolohiya sa ilalim ng single electronic window platform.
Target naman aniya ng kawanihan na ipatupad ang bahagi ng Customs Modernization Project ngayong taon, kasabay ng pagtitiyak na isusunod agad ng BOC ang “digital project link” na aniya’y pinakamahalagang elemento ng modernisasyon.
“At least, to get that significant level of automation, give us another two to three years when a substantial portion of this modernization project can already be seen and felt,” sambit ni Maronilla.
Sa ilalim ng modernisasyon,
hindi na kailangan pang tumungo sa mga tanggapan ng BOC para sa pagkuha ng mga transaction forms, pagsusumite at pagsasaayos ng mga dokumento.
“Actually we have already done a lot to fully automate our processes but the expectation is for the bureau to automate it at once. We fully realized during the term of Commissioner [Rey Leonardo]
Guerrero that we need to look at our processes to automate what needs to be automated,” dagdag pa niya.
Kabilang aniya sa mga pinakatampok na elemento ng programa ang pagtataguyod ng Customer Care Center (CCC) sa 17 district collection offices sa bansa. Sa ilalim ng CCC, lahat ng mga transaction ay isasagawa “online” upang maiwasan ang posibilidad ng “aregluhan.”
“The CCC concept has already significantly reduced face-to-face transactions. There’s
no more need to go to the pier to file the entry and other documents, which if done manually would no longer be accepted by the system,” aniya.
Gayunpaman, nananatiling hamon pa rin sa kawanihan ang “interconnection” na aniya’y inaasahang mabibigyang solusyon sa ilalim ng kanilang bagong sistema. (ANGEL F. JOSE)
392
