TARGET NI KA REX CAYANONG

UMUUGONG ang laban para sa posisyon ng kongresista sa Ikalawang Distrito ng Parañaque habang patuloy ang mainit na tunggalian sa pagitan ng kasalukuyang kongresista na sina Gus Tambunting at Cong. Brian Yamsuan ng Bicol Saro Party-list.

Lalong nagiging matindi ang kompetisyon sa gitna ng nagbabagong sentimyento ng mga botante.

Batay sa pinakahuling independent at non-commissioned survey ng ‘Boses ng Bayan’ para sa 2025 elections, na isinagawa ng RPMD Foundation Inc. (RPMD) mula Pebrero 15-20, 2025, kasalukuyang nangunguna si Cong. Yamsuan na may 56% na boto mula sa mga botante.

Si Tambunting naman ay may 36% lamang, habang may 8% pang hindi tiyak kung sino ang kanilang susuportahan—isang porsyentong maaaring makaapekto pa sa magiging resulta ng halalan.

Ayon kay Dr. Paul Martinez, Global Affairs Analyst at Executive Director ng RPMD, isa sa pangunahing mga dahilan ng pagbaba ng suporta kay Tambunting ay ang pakiramdam ng ilang residente na sila ay napabayaan sa kanyang termino.

Dahil dito, unti-unting lumilipat ang suporta ng mga botante kay Yamsuan, na nakikita bilang isang bagong lider na may konkretong plano para sa distrito.

Sinasabing ang pagbabagong ito ay nagpapakita ng lumalakas na impluwensya ni Yamsuan, habang patuloy siyang umaakit ng mga botanteng dati’y kaalyado ni Tambunting.

Ang survey ng RPMD ay isinagawa sa 1,800 respondents na random na pinili mula sa iba’t ibang sektor ng lipunan upang matiyak ang mataas na antas ng representasyon.

Nilinaw naman dito na ang pag-aaral ay may ±2% margin of error sa 95% confidence level, na nagpapatibay sa pagiging kapani-paniwala ng resulta.

Isa sa pangunahing mga tanong sa survey ay: “Kung ang halalan ay gagawin ngayon, sino ang iboboto mong kongresista?”

Ang ‘Boses ng Bayan’ survey sa Ikalawang Distrito ng Parañaque ay bahagi ng nationwide election survey series ng RPMD, na may layuning bigyan ng malinaw na larawan ang publiko tungkol sa kasalukuyang estado ng pulitika sa kani-kanilang mga rehiyon.

Ang pagsusuring ito ay isang mahalagang pampublikong serbisyo upang bigyan ang mamamayan ng impormasyon na makatutulong sa kanilang pagboto.

Habang papalapit ang halalan, isa ang laban sa Ikalawang Distrito ng Parañaque sa inaabangang labanan sa Kamara.

Habang patuloy na lumalakas ang kampanya ni Yamsuan at sinisikap ni Tambunting na muling makuha ang suporta ng kanyang nasasakupan, magiging mahalaga ang susunod na mga buwan sa paghubog ng magiging resulta sa darating na halalan.