HINIKAYAT ni Senate President Vicente Sotto III ang Inter-Agency Task Force (IATF) at Department of Health (DOH) na tanggalin na ang regulasyon sa bumabalik na overseas Filipino workers (OFWs) na sumailalim sa 14-day quarantine kahit fully vaccinated o nabakunahan na sila.
Sa pahayag, sinabi ni Sotto na “walang kuwenta” ang regulasyon dahil binabalewala nito ang bisa ng itinurok na bakuna sa kanila mula sa pinanggalingang bansa.
“Why do fully vaccinated people have to still do the two-week quarantine when travelling to the Philippines,” tanong ni Sotto.
Ayon kay Sotto, dapat nang tanggalin ang naturang regulasyon sa bakunadong OFWs hangga’t sinusunod pa rin nila ang health protocol o pamantayan sa pakikihalubilo sa sinoman.
“It doesn’t make sense! It defeat the purpose of vaccination so we can open the economy,” dagdag ni Sotto.
Kamakailan, inilatag ng Department of Foreign Affairs (DFA) at Bureau of Immigration na kailangan sumailalim sa 14-day quarantine ang lahat ng papasok na OFWs kahit bakunado na.
Sinabi ng Immigration na wala pang ipinalalabas na bagong patakaran ang IATF hinggil sa bakunadong OFWs na dumarating bansa kundi isailalim pa rin sila sa quarantine.
Ngunit, sinabi ni Sotto na tila kabalintunaan ang polisiya dahil walang mahihikayat na dayuhang mamumuhunan o Filipino na mamuhunan sa bansa kung isasailalim pa sila sa quarantine kahit bakunado na pagdating ng Pilipinas.
“Vaccinated investor won’t come because they have to quarantine or even Filipinos who are vaccinated are having second thoughts,” giit ni Sotto. (ESTONG REYES)
155 
