LABING-ANIM na kagawaran ang nagkasundong magtutulungan upang matiyak na mabigyan ng trabaho ang mga manggagawang nawalan ng trabaho dulot ng COVID-19.

Ayon kay Secretary Karlo Nograles, lumagda sa memorandum ang Department of Labor and Employment (DOLE), Department of Trade and Industry (DTI), Technological Education and Skills Development Administration (TESDA), Commission on Higher Education (CHEd), Department of Agrarian Reform (DAR), Department of Agriculture (DA), Department of Education (DepEd), Department of Environment and Natural Resources (DENR), Department of Information and Communications Technology (DICT), Department of the Interior and Local Government (DILG), Department of Public Works and Highways (DPWH), Department of Science and Technology (DOST), Department of Tourism (DOT), Department of Transportation (DOTr), National Security Council (NSC) at ang Office of the Cabinet Secretary (OCS) para ikasa ang National Employment Recovery Strategy (NERS) ng administrasyon.

Sa nilagdaang memorandum ng bawat pinuno ng 14 kagawaran at dalawang tanggapang nasa ilalim ng Office of the President (OP), 2.8 milyon ang target nitong likhaing trabaho ngayong 2021.

Madaragdagan ito ng 1.2 milyong trabaho sa 2022 na ang ibig sabihin ay hindi na magiging suliranin ng mga manggagawa ang kawalan ng trabaho sa Pilipinas kahit tapos na ang termino ni Pangulong Rodrigo Duterte sa Hunyo 30,2022.

Ipinunto ni Nograles, kung maipatutupad ng NERS ang target nitong magkaroon ng 2.8 milyong trabaho sa buong 2021 ay siguradong walang Filipino na walang trabaho ngayon taon dahil ang ginamit na datos nito ay ang bilang na inilabas ng Philippine Statistics Authority (PSA) na 420,000 mga manggagawa ang nawalan ng trabaho dahil sa lockdown na ipinatupad ni Duterte laban sa COVID-19.

Noong Enero, inihayag ni DOLE Secretary Sylvestre Bello III na limang milyong manggagawa ang nawalan ng trabaho noong 2020.

Sabi ng Social Weather Stations (SWS), umabot sa 12.7 milyon ang nawalan ng trabaho noong Nobyembre 2020 mula sa 23.7 milyon ng nakalipas na dalawang buwan.

Ipinaliwanag ni Nograles, naniniwala ang “NERS Task Force, [that] there is a lot of hard work ahead, but just thinking of the employment we will help create and keep, and the lives that we will help make better, is more than enough motivation to press on”.

Sabi pa niya, ang “signatory and partner agencies are all in agreement that we need to support the Filipino worker during these challenging times with programs that are immediate in implementation and comprehensive in scope”.

Ang inginuso ni Nograles na pagkukunan ng trabaho ay ang 1.1 milyong malilikhang trabaho ng programang “Build, Build, Build (BBB).

Walang bagong proyektong pasisimulan ang DPWH at DOTr ngayong taon na may kaugnayan sa BBB dahil ang mga proyekto nito ay nagsimula sa nakalipas na mga taon.

Pamumunuan ni Bello ang NERS Task Force. (NELSON S. BADILLA)