(NELSON S. BADILLA)

INUTIL ba o sadyang matindi ang pinaiiral na “red tape” ng Food and Drug Administration (FDA) na pinamumunuan ni Undersecretary Eric Domingo?

Ito ang gustong malaman ng Anti-Red Tape Authority (ARTA) na pinamumunuan ni Jeremiah Belgica makaraang madiskubre na mahigit 600 aplikasyon ng mga kumpanya ng gamot ang hindi pa pumasa sa FDA, gayong kumpleto naman ang mga rekesito nila.

Ang FDA ang nagbibigay ng awtorisasyon at lisensya upang legal na makagawa at makapagbenta ng mga gamot ang isang kumpanya.

Ayon sa ARTA, ang ibang aplikasyon sa mahigit 600 ay nakapila sa FDA noon pang 2014.

Batay sa nadiskubre ng ARTA, naglabas ang ahensiya ng show cause order laban sa ilang opisyal ng FDA upang magpaliwanag sa reklamo laban sa kanila.

Partikular na madidiin sa anomalya si FDA – Center for Drug Regulation and Research (CDRR) Director Jesusa Cirunay.

Pinagpapaliwanag din si Cirunay kung bakit hindi siya dapat ihabla ng ARTA ng mga kasong kriminal at administratibo na nakaugnay sa red tape sa mahigit 600 aplikante sa FDA.

Habang isasagawa pa lamang ang imbestigasyon laban kay Cirunay at iba pang opisyal, hiniling ni Belgica na magpasya na ito hinggil sa mga aplikasyon.

Ayon kay Belgica, hindi niya maunawaan kung bakit ayaw aprubahan ng FDA ang aplikasyon, gayong kumpleto naman ang ipinasang mga rekisito sa kanilang ahensya.

Ang ibang kumpanyang nakabinbin ang aplikasyon sa FDA ay “renewal” lamang ng lisensya ng kanilang produkto na matagal na ring ibinebenta sa merkado.