SIYAM na opisyal ng isang investment group ang kinasuhan ng NBI Lucena District Office ng 40 counts ng syndicated estafa matapos na mangolekta ng milyong pisong halaga ng contributions mula sa tinatawag nilang “investors” sa kanilang “paluwagan” scheme sa lalawigan ng Quezon.

Ayon sa rekomendasyon ni Atty. Bernard de la Cruz, Agent-in-Charge ng NBI-Lucena, sinampahan sa Provincial Prosecutors Office sa bayan ng Infanta, Quezon ng kasong paglabag sa Article 315, Paragraph 2 ng Revised Penal Code in relation to Presidential Decree no. 1689, at ng kasong paglabag sa Securities Regulation Code under Republic Act 8799, ang siyam na administrator ng grupong tinatawag na “Team Payaman”.

Ito ay matapos magreklamo sa NBI ang 40 biktima na sumali sa grupo at nakuhanan ng kabuang halaga na umabot sa P31,568,861

Kinilala ang siyam na kinasuhan na sina Grace Gamase, 40; Kimberly Claire Peñamante Sucuano, 22; Marialyn Quirrez-Peñaojas, 34; Nielyn America-Vargas, 40, at Lorelie Gamase-Armada, 42, pawang taga Infanta, Quezon, at sina Marian Hayno Avellano, 24; Eva Suco; Ronabelle Beguia-Cirineo, at Rica Rutaquio, pawang taga Real, Quezon.

Sa loob ng 8 buwan, nakapaghulog ang nasabing mga miyembro o “investors” ng mula sa halagang P50,000 at ang pinakamalaki ay umabot sa halagang P2 milyon.

Nangyari ang nasabing investment scam mula Mayo 2022 hanggang Enero 2023 sa Infanta, Quezon

Ayon sa NBI, na-establish ang kasong estafa o swindling sa pamamagitan ng pag-oorganisa ng mga administrator ng Team Payaman ng “paluwagan o tornohan” na isang uri ng lokal na investment scheme.

Sa pamamagitan ng social media at personal invitation sa mga kakilala, nangungumbinsi ang mga ito ng sasali sa ‘paluwagan’ at kokolektahan ng pera ang mga miyembro kapalit ng malaking tubo na babalik anila sa kanila na mas mataas pa umano sa offer ng ilang financial institutions at mga banko.

Kinokolekta ng mga administrator ng hulog ng mga amiyembro sa pamamagitan ng G-Cash, bank transfer at personal contributions.

Para makumbinsing sumali ang mga target member at hindi maghinalang scam ang kanilang modus, nagpo-post ang grupo sa kanilang social media account ng mga litrato ng maraming pera na sinasabing milyon ang halaga, mga mamahaling alahas, mga bagong sasakyan at mga bagong bahay na sinasabi nilang pwedeng makamtam ng tinatawag nilang “investors” o mga sasali sa paluwagan kapag bumalik na ang kanilang investment.

Base sa scheme ng Team Payaman, bawat buwan ay may pay-out at isang miyembro ang sasahod na madedetermina sa pamamagitan ng raffle.

Ayon pa sa NBI, nakita ang pagkakaroon ng conspiracy sa pagitan ng mga administrator ng organisasyon matapos bumuo at lumagda lahat ang ang mga ito sa “kasunduan” kung saan nakalagay na sila ang magpapatakbo sa organisasyon.

Nakasaaad din sa kasunduan ang internal rules at guidelines na dapat sundin ng mga magiging miyembro at penalties sa mga lalabag sa pakaran ng samahan.

Ayon pa sa dokumento ng NBI, kapag naging miyembro na ang isang target investor, makatatanggap agad ang miyembro ng maliit na halaga o umano ay tubo upang lumabas na legitimate investment ang kanilang sinalihan.

Subalit ayon sa mga biktima, makalipas ang ilang buwan ay tumigil na ang pay-out at nabigo ang mga administrator na maibalik ang kanilang sinasabing investment at ang principal contribution ng kanilang pinaghirapang pera.

Nakita rin ng mga ito ang maluhong pamumuhay ng mga administrator, na ang ilan ay nakapagpatayo ng magagandang bahay, nakabili ng mga bagong sasakyan at mga mamahaling alahas.

Bunsod nito, nagpasya na ang mga ito na dumulog sa NBI.

Napag-alaman din na ang nasabing asosasyon ay walang kaukulang lisensya at mga papeles mula sa Securities and Exchange Commission at hindi rin ito nakarehistro.

Noong Hunyo 15, tinanggap na ng senior assistant provincial prosecutor ng Hall of Justice sa Infanta, Quezon ang kopya ng demanda laban sa mga suspek.

(NILOU DEL CARMEN)