PINALAGAN ng isang Mindanao solon ang travel advisory ng Estados Unidos (US) na nagbabala sa mga Amerikanong may planong bumiyahe sa Pilipinas, partikular na sa Mindanao, dahil sa panganib na kakaharapin umano ng mga ito.

Hindi matanggap ni Cagayan de Oro City representative Rufus Rodriguez ang travel advisory na ito ng Amerika na itinuturing ng Pilipinas na mahigpit na kaalyado kaya inatasan nito ang Department of Foreign Affairs (DFA) na iprotesta ito.

“This is an unfair, shotgun warning. There are certainly many places in our country that are safe to tourists. The United States should review this advisory. We do not deserve this unfair treatment from our No. 1 ally,” pinunto ni Rodriguez.

Nais ng mambabatas na ipatawag ng DFA si US Ambassador to the Philippines MaryKay Carlson na ipaliwanag ang nasabing advisory dahil hindi ito makatarungan at posibleng makaapekto sa industriya ng turismo ng ating bansa.

Bukod dito, kailangang ding pagpaliwanagin ni Pangulong Ferdinand ‘Bongbong’ Marcos Jr. si Philippine Ambassador to the US Jose Manuel Romualdez at maging ang Department of Tourism (DoT) kung ano ang kanilang naging aksyon lalo na’t ang nasabing travel advisory ay inilabas noong Mayo 8, 2025 pa.

“It discourages not only Americans but other foreign tourists as well from visiting the Philippines. It will surely hurt our tourism sector,” ayon kay Rodriguez, lalo na’t ang nasabing travel advisory ay maaaring magkaroon ng malaking epekto umano sa Mindanao.

Base sa travel advisory ng US State Department, inilagay ang Pilipinas sa Level 2 na kailangang maging maingat ang mga Amerikanong nais bumiyahe dito dahil umano sa laganap na kriminalidad, terorismo, civil unrest at mga kaso ng kidnapping.

Pinayuhan pa umano ang mga Amerikano na huwag pumunta sa Sulu Archipelago, kasama na sa Southern Sulu Sea at Marawi City na talamak ang iba’t ibang krimen at problema.

Ganito din umano ang sitwasyon sa ibang lugar sa Mindanao kaya ipinakokonsidera ng US State Department sa kanilang mamamayan ang kanilang plano kung may balak ang mga ito na pumunta sa nasabing rehiyon.

“Country Summary: Terrorists and armed groups have carried out kidnappings, bombings, and other attacks targeting public areas like tourist sites, markets, and local government facilities in the Philippines. Violent crimes are also common in the Philippines such as robbery, kidnappings, and physical assaults. Protests happen in the Philippines and could turn violent and/or result in traffic jams and road closures with limited capacity of the local government to respond,” saad sa bahagi umano ng travel advisory.

(BERNARD TAGUINOD)