INAPRUBAHAN sa plenaryo ng Mababang Kapulungan ng Kongreso ang rekomendasyon ng Quad Committee na kasuhan sina dating pangulong Rodrigo Duterte, Sens. Ronald “Bato” Dela Rosa at Lawrence Christopher “Bong” Go dahil sa kanilang papel sa extra-judicial killings at Philippine Offshore Gaming Operators (POGO).

Sa Committee Report (CR) 1501 na binasa ni Surigao del Norte Rep. Robert Ace Barbers at lead chairman ng Quad Comm, inirekomenda ng komite na sampahan ng paglabag sa Section 6 ng Republic Act (RA) 9851 o Crimes Against Humanity dahil sa kanilang papel sa extra-judicial killing noong ipatupad ng mga ito ang war on drugs.

“Former President Duterte admitted that he ordered the PNP to kill drug personalities if they fight or, if they won’t fight, force them to fight to justify the killing,” ayon sa committee report na binasa ni Barbers.

Sabit sa kaso si Dela Rosa dahil siya ang nagplano at nagpatupad ng madugong war on drugs bilang unang hepe ng Philippine National Police (PNP) ng Duterte administration.

Hindi rin nakalusot si Go sa rekomendasyon ng komite dahil sa testimonya ni dating Police Colonel Jovie Espenido na ang dating Special Assistant to the President (SAP) ang nagbibigay ng reward money sa bawat mapatay na drug suspect.

“[Go] played a crucial role in the disbursement of funds relating to the rewards system. The funding of the cash rewards came from, among others, POGO entities,” ayon pa sa report ni Barbers.

Kasama sa pinakakasuhan sina dating Philippine National Police (PNP) Chiefs Oscar Albayalde, Debold Sinas, PCol. Royina Garma at Edilberto Leonardo na pawang nasa likod umano ng war on drugs.

Bukod sa crimes against humanity, pinakakasuhan din ng komite ng murder sina Duterte, Garma, Leonardo, dating SPO4 Arthur Narsolis at si Correction Senior Supt. Gerardo Padilla dahil sa pagpatay sa 3 Chinese drug lords na nakakulong sa Davao Prison and Penal Farm noong Agosto 13, 2016.

(BERNARD TAGUINOD)