NANGUNA sa relief operations sa Negros sina DOT Secretary Christina Garcia Frasco at Education Secretary Sonny Angara kasunod ng direktiba ni Pangulong Ferdinand R. Marcos Jr., para tulungan ang mga nasalanta ng bagyo.

Kasama sa tulong ng gobyerno ang pagkakaloob ng P95 milyong presidential aid para sa Negros matapos bisitahin ang lugar.

Ang inilaang pondo ay upang palakasin ang rehabilitation efforts ng gobyerno.

Sa nasabing pondo, P50 milyon ang mapupunta sa probinsya ng Negros Occidental, at tig-P10 milyon sa La Carlota City at munisipalidad ng La Castellana at Moises Padilla.

Samantala, tig-P5 milyon naman ang inilaan sa munisipalidad ng Binalbagan, Isabel at Hinigaran.

Bumisita rin si DOT Secretary Frasco sa mga lugar na malubhang napinsala ng bagyo at mga residential area upang matukoy ang lawak ng pinsala at alamin kung saan maaaring magbigay ng tulong ang gobyerno, kasama ang mga lokal na opisyal tungkol sa kalagayan ng mga pagsisikap sa pagkukumpuni, partikular sa Biao spillway sa Binalbagan, isang mahalagang daan patungo sa ibang mga barangay at isang tourism road.

Ininspeksyon din ng cabinet executives ang Jose Pepito Montilla Garcia Sr. National High School, na binaha na aabot sa kisame, at pinsala sa mga kagamitan at ari-arian sa pag-aaral dahil sa Bagyong Tino.

Samantala, nakipagpulong din si Secretary Frasco sa mga opisyal mula sa Riverside Area ng Brgy. Poblacion sa Moises Padilla at sa Gubang Buhangin River “Wipe-Out Bridge” sa La Castellana upang matukoy kung saan dapat unahin ang pondo ng gobyerno upang mapabuti ang access, koneksyon, at kapakanan, lalo na sa panahon ng pag-ani at paggiling.

(JOCELYN DOMENDEN)