TARGET ni KA REX CAYANONG

SA panahon ngayon na madalas inuuna ang ingay kaysa gawa, mahalagang kilalanin ang mga lider na mas pinipiling magtrabaho nang tahimik ngunit may malinaw na direksyon.

Isa sa kanila si Mayor Gel Alonte ng Biñan, na kabilang sa Top Performing Mayors ng Laguna para sa taong 2025, ayon sa Pulso ng Bayan Year-End Survey ng Social Pulse Philippines.

Hindi maliit na bagay ang makapagtala ng 86.5% satisfaction rating mula sa libo-libong respondent. Ang numerong ito ay hindi lamang estadistika, kundi kolektibong tinig ng mamamayan na araw-araw na nakikinabang sa maayos na pamamahala ng lokal na pamahalaan ng Biñan.

Sinasabing sa likod ng bawat porsiyento ay mga serbisyong tunay na naramdaman, mga programang may saysay at pamumunong may malasakit.

Kaya sa ilalim ng pamumuno ni Mayor Alonte, nananatiling nakatuon ang Biñan sa balanseng pag-unlad.

Habang patuloy ang pag-usbong ng lungsod bilang sentro ng negosyo at industriya, hindi napapabayaan ang pangangailangan ng karaniwang mamamayan.

Serbisyong pangkalusugan, kaayusan ng komunidad, at suporta sa mga sektor na higit na nangangailangan ang patuloy na binibigyang-halaga ng kanyang administrasyon.

Hindi rin matatawaran ang kanyang kakayahang panatilihin ang katatagan ng lungsod sa gitna ng mabilis na pagbabago.

Bunga ng lumalaking populasyon at hamon sa imprastraktura, mahalaga ang pamumunong may malinaw na plano at kakayahang makinig sa tinig ng mamamayan. Dito umuusbong ang tiwala, isang pundasyong hindi madaling makuha ngunit kayang panatilihin sa pamamagitan ng tapat na serbisyo.

Ang pagkakabilang ni Mayor Gel Alonte sa hanay ng pinakamahuhusay na alkalde sa Laguna ay patunay na hindi kailangang manguna sa ranggo upang makilala ang husay.

Ang mahalaga ay ang patuloy na paggawa ng tama, ang pagiging bukas sa pangangailangan ng komunidad, at ang pagkakaroon ng malasakit na hindi natatapos sa panahon ng eleksyon.