OPISYAL na binuksan ng ACE Builders ang pinakamalaking tindahan nito sa Asya sa SM City Baliwag noong Enero 16, 2026. Dumalo sa ribbon-cutting ceremony sina (mula kaliwa pakanan): SM City Baliwag Mall Manager Rodora Tolentino; SM Retail Inc. President Jonathan Ng; Baliwag City Mayor Sonia Estrella; Ace Hardware Philippines Inc. Director JV Cobankiat; AHPI Business Unit Head Alvin So; Ace International Sales Director Calvin Kim; at AHPI Vice President for Supply Chain Alex Kho.

PORMAL nang binuksan sa publiko ang pinakamalaking ACE Hardware hindi lamang sa Pilipinas kundi sa buong Asya sa ginanap na inauguration ceremony kamakailan sa SM City Baliwag.

May kabuuang sukat na mahigit 6,000 metro kuwadrado, ang ACE Builders SM City Baliwag ang pinakabago, pinakamalawak, at ika-238 na sangay ng ACE Hardware Philippines. Nag-aalok ito ng kumpleto at malawak na hanay ng mga kagamitan para sa konstruksyon, pagawaan, at pang-araw-araw na pangangailangan ng mga mamimili.

Dinisenyo para sa parehong mga may-ari ng bahay at mga propesyonal, pinagsasama ng ACE Builders SM City Baliwag ang laki, seleksyon, at kalidad ng serbisyo upang makapaghatid ng mas episyente at komprehensibong karanasan sa pamimili.

Matatagpuan sa iisang lugar ang lahat ng mahahalagang produkto mula sa mga pangunahing kategorya tulad ng Tiles and Flooring, Wall Cladding, Sanitary Wares at Plumbing, Paint at Paint Accessories, Electrical, Lawn and Garden, Home Hardware, Small Appliances, Hand and Power Tools, Automotive Products, Chemicals and Cleaning Solutions, Pet Care Essentials, at Home Basics and Storage.

Mula sa malalaking proyekto ng renobasyon hanggang sa mga simpleng pagpapahusay ng bahay, idinisenyo ang tindahan upang matugunan ang pangangailangan ng mga modernong pamilyang Pilipino, kontratista, at mga propesyonal sa larangan ng konstruksyon.

Ang ACE Builders SM City Baliwag ay bahagi ng network ng mga flagship store ng ACE Builders, kabilang ang mga sangay sa North EDSA, Fairview, at Pampanga.

Sa pagbubukas ng pinakamalaking lokasyon nito hanggang ngayon, patuloy na pinalalawak ng ACE Hardware Philippines ang saklaw nito at pinahuhusay ang akses ng publiko sa de-kalidad na materyales sa konstruksyon at mga solusyon para sa tahanan.

Mula nang buksan ang unang tindahan nito noong 1997 sa SM Southmall sa Las Piñas, lumago ang ACE Hardware Philippines bilang isa sa mga nangungunang hardware retail chains sa bansa, na ngayon ay may 238 na sangay sa buong Pilipinas.

Ipinakilala ang konsepto ng ACE Builders upang makapagbigay ng mas malawak at mas espesyalisadong mga produkto para sa mas malalaking proyekto sa bahay at konstruksyon.

Inaasahang masisiyahan ang mga mamimili sa mga eksklusibong promo at espesyal na alok sa araw ng pagbubukas, gayundin sa tulong ng mga eksperto at propesyonal na kawani ng tindahan.

Dahil sa maginhawang lokasyon nito sa SM City Baliwag, inaasahang magiging pangunahing destinasyon ang ACE Builders para sa pagtatayo, pag-aayos, at pagpapahusay ng mga espasyong matitirhan sa Bulacan at mga karatig-lugar.