(PHOTO BY MJ ROMERO)

NAGTALA ang Ateneo de Manila University at Arellano University ng magkahiwalay na panalo, para manatiling walang talo sa Premier Volleyball League Season 3 Collegiate Conference kahapon sa Filoil Flying V Centre sa San Juan.

Ikalawang sunod na panalo ang sinungkit ng reigning UAAP champions Lady Eagles, nang talunin sa straight sets ang San Sebastian College, 25-17, 25-17, 25-8 sa Group A.

Muling nagpakitang-gilas si prized rookie Faith Nisperos, na may 15 points (11 attacks at four aces), habang si Ponggay Gaston, hindi nakalaro sa opening match noong nakaraang linggo, ay nagsumite ng 10 points na halos lahat ay galing sa spikes.

May 20 excellent sets naman si setter Jaja Maraguinot para tulungan ang Lady Eagles na magbaon ng 35 attacks.

“Everything is a learning process pa rin. You just have to keep on learning and learning. We really have to maximize our players para mas lumalim ang cohesiveness namin,” komento ni Ateneo coach Oliver Almadro. “We know naman na our team is basically young, mostly are sophomores and freshmen so kailangan naming magkaroon talaga ng tiwala sa isa’t isa. Talagang every game and every practices are a learning day for us.”

Nangailangan naman ang three-time NCAA champions Lady Chiefs ng ekstrang set para talunin ang Lyceum of the Philippines University, 25-23, 12-25, 25-21, 25-21, para sa kanilang back-to-back wins sa Group B.

Kulang sa tao ang Arellano U bunga ng mga injury nina top hitter Regine Arocha (ankle injury), Carla Donato (hand injury), Jehan Hussain (knee injury) at backup setter Donnalyn Paralejas (allergy).

Wagi rin ang Adamson University Lady Falcons laban sa University of Perpetual Lady Altas, 25-20, 25-19, 25-13.