SINIMULAN na ng pamahalaan ang pagtuturok ng booster shots kontra COVID-19 para sa mga senior citizens at may karamdaman.

Gayunpaman, may kondisyon ng inilatag ang Department of Health (DOH). Anila, tanging mga nakumpleto na ng dalawang doses may anim na buwan na ang nakakaraan pwedeng maturukan ng booster shot. Tatlong buwan naman dapat anila ang pagitan kung naturukan ng single dose ng Janssen COVID-19 vaccine.

Paglilinaw pa ng kagawaran, walang dapat ikabahala kung iba sa naunang itinurok ang matatanggap ng booster shot. Pinahihintulutan din ang pagpili ng bakuna – depende sa suplay na mayroon ang vaccination center.

Ayon kay Health Undersecretary Maria Rosario Vergeire, maaaring magpaturok ng booster shots ang mga taong may HIV, may terminal cancer, mga sumailalim ng transplant at maging yaong mga dumaan sa tinatawag na immunosuppressive treatments.

Kaugnay nito, sinimulan na ring turukan ng COVID-19 booster shots ang health workers sa Valenzuela City.

Isinagawa ang pagbabakuna dakong 8 am hanggang 5 pm noong Sabado sa Valenzuela People’s Park Amphitheater.

Kailangan lang magpakita ng health workers ng kanilang VCVax Passports bilang patunay na sila ay kumpletong bakunado bago sila bigyan ng AstraZeneca o Pfizer vaccine.

Binigyan din sila ng bagong VCVax Booster Dose Card matapos turukan. (ALAIN AJERO)