Ni VT ROMANO
BUMIDA ang veteran player ng Boston na si Al Horford sa come from behind win ng Celtics kontra Golden State Warriors, 120-108, sa Game 1 ng best-of-seven NBA Finals series Biyernes (Manila time).
Umiskor si Horford ng 26 points, 11 dito ay sa fourth quarter, upang ipalasap sa Golden State ang first home defeat nito sa post-season sa Chase Center.
Pinangunahan ng Celtics veteran ang 8-0 rali sa huling yugto upang bumangon mula sa 12-point deficit sa third quarter.
Maliban sa kanya, naging key piece rin sa Boston victory si Jaylen Brown, may 24 points at nanguna sa fourth quarter charge ng Celtics.
Nagpaulan ng 9 of 12 from beyond the arc ang Celtics sa final 12 minutes at halos lahat ay nag-ambag sa 3-point flurry, liban kay Jayson Tatum na may 3 for 17 shooting lang at total 12 points.
Kumana ng 21 points, kabilang ang limang tres, si Derrick White, habang si Boston defensive player Marcus Smart ay may back-to-back three pointers din sa fourth at nagtapos na may 18 points.
Kahit lahat ng Boston players ay ngayon lang nakarating sa NBA Finals, nagawa nilang ma-outscore ang three-time NBA champion sa fourth quarter, 40-16.
Hindi nagpatinag ang Celtics sa kabila ng dazzling shooting display ni Warriors’ Stephen Curry – kumana ng 21 points sa first quarter kabilang ang record six 3-pointers.
Ngunit nahirapan na siya at iba pang Warriors na umiskor sa huling yugto. Sa kabila nito ay nakapagtala si Curry ng total 34 points.
Nagdagdag si Andrew Wiggins ng 20 points sa kanyang finals debut, si Draymond Green ay may 11 rebounds bago nag-foul out sa nalalabing 48.3 seconds.
Nagposte ng 15 points si Klay Thompson, habang may 12 points off the bench si Otto Porter Jr. sa Warriors, sixth finals na sa loob ng eight years o simula nang unang magkampeon ang team noong 2015.
“It’s a different feeling. You obviously go into Game 2 with more of a sense of desperation. That’s all part of this stuff. We’ve been in this position before,” sabi ni Golden State coach Steve Kerr.
Pinuri din niya ang Celtics sa panalo nito.
“Boston played a brilliant quarter. They came in and earned the win.”
May pag-asang bumawi ang Warriors sa Game 2 sa San Francisco pa rin sa Lunes (Manila time).
291
