MATUTULOY kaya ang pagdaraos ng 31st Southeast Asian Games sa Mayo sa Hanoi, Vietnam?
Malalaman ang kasagutan ngayong araw hanggang sa Linggo, sa pulong ng lahat ng chef de mission ng 11 bansang miyembro ng SEA Games Federation, kabilang ang Pilipinas na naging host ng matagumpay na 30th edition noong 2019.
Mismong si Philippine Olympic Committee (POC) president Abraham “Bambol” Tolentino ang kakatawan sa bansa sa naturang pagpupulong bilang kapalit ni Philippine Sports Commission (PSC) Commissioner Ramon Fernandez, na nangangamba umano sa COVID.
“Mon (Fernandez) begged off maybe because of the reported spike of COVID cases in Vietnam, which incidentally was also the reason why may lumabas na mga proposal na ipagpaliban muna or completely cancel the Games this year,” paliwanag ng POC chief sa kolumnistang ito.
Kasalukuyan pa rin nakikibaka ang Vietnam sa COVID-19 pandemic at ayon sa mga ulat, may 160,000 nang mga kaso ang naitala simula noong Enero.
Subalit sa tingin ni Tolentino ay walang makapipigil sa host city para hindi ituloy ang palaro sa Mayo 12 hanggang 23. “So I, myself decided to take over Mon’s job as CDM, at least temporarily during Friday’s meeting of the national contingent, to show the Vietnam Organizers the Philippines’ resolve to help solve the problems befacing them.”
Giit pa niya, susuportahan ng bansa anuman ang magiging desisyon ng Vietnam. “Whatever happens in the next few days, rest assured that the Philippines is behind whatever will be the host’s decision.”
Makakasama ni Tolentino sa Hanoi si dating POC chair Tom Carrasco, deputy secretary general Carl Sambran at golf federation secretary general Bons Floro.
Ang Pilipinas, overall champion sa 2019 SEA Games, ay magpapadala ng 584 atleta sa Hanoi, kabilang ang 161 coaches mula sa 39 sports. Hindi pa kasama sa bilang ang 80 atletang kakatawan sa ilang sports discipline na naghihintay pa ng basbas ng POC.
107
